Arsim Selmonmusaj, asamblist në Pejë, drejtor në kompaninë “Elkos” dhe ish-nënkryetar i Dhomës së Tregtisë Kosovë, ka bërë thirrje për ndërhyrje urgjente të shtetit në përballje me rritjen e çmimeve.

Sipas tij, është e domosdoshme që të ndërmerren masa konkrete për uljen e çmimeve të naftës, benzinës dhe energjisë elektrike, si produkte bazë që ndikojnë drejtpërdrejt në rritjen e përgjithshme të çmimeve dhe në koston e jetesës së qytetarëve në Kosovë.

Ai ka shkruar në Facebook se, nëse Qeveria nuk merr vendim për uljen e akcizës, TVSH-së dhe tatimeve për këto produkte, qytetarët do ta kenë gjithnjë e më të vështirë përballimin e rritjes së kostos së jetesës.

Selmonmusaj ka bërë thirrje që institucionet të reflektojnë në të mirë të qytetarëve dhe në ruajtjen e stabilitetit ekonomik të vendit.

Në seancën e kaluar të Kuvendit të Kosovës, LDK-ja ka propozuar “Votimi i Propozim-Rezolutës për rritjen e çmimeve të naftë, mungesa e ndërhyrjes së Qeverisë dhe ndikimi i drejtpërdrejtë në koston e jetesës si dhe stabiliteti ekonomik i vendit”.

Shefja e Grupit Parlamentar të LDK-së, Jehona Lushaku Sadriu, përmes kësaj rezolute, ka kërkuar nga qeveria uljen e përkohshme të akcizës nga 36 cent në 20 cent në litër me afat të përkohshëm.

Po ashtu, është kërkuar edhe ulja e përkohshme e TVSh-së në karburante, por edhe që urgjentisht të gjej forma për të subvencionuar çmimin e naftës për bujqësinë, transportin publik dhe prodhuesit vendor.

Këto janë kundërshtuar nga anëtarë të kabinetit qeveritar, ku ka pasur kundërshtime e replika mes pozitës e opozitës.

/Kosovapress/