Rusia ka shpallur fitoren në Bahmut, qytet në lindje të Ukrainës, ndonëse zyrtarët ukrainas pretendojnë se luftimet vazhdojnë.

Presidenti ukrainas Volodymyr Zelensky, më 21 maj, në Japoni ka thënë se pak ka mbetur nga Bahmuti dhe se qyteti është shkatërruar pothuajse plotësisht.

I pyetur nëse Bahmuti ishte nën kontrollin e Ukrainës, Zelensky nuk ka qenë plotësisht i qartë, por ka thënë: Mendoj që jo”, gjë që u interpretua si konfirmim i humbjes së Bakhmutit.

“Sot, Bahmuti është vetëm në zemrat tona”, është shprehur Zelensky në Hiroshimë, ku ka qenë i ftuar në samitin e grupit G7, ku kanë marrë pjesë liderët e vendeve më të zhvilluara ekonomikisht në botë.

Megjithatë, zyra e presidentit ukrainas më vonë ka sqaruar se Zelensky nuk ka deklaruar se qyteti ka “rënë”.

Zëdhënësi i presidentit ukrainas, Sergiy Nykyforov ka mohuar pretendimet se Bahmuti ka rënë në duart e forcave ruse, shkruan Rel.

Ai i ka thënë CNN-it se përgjigja e Zelenskyt, “mendoj që jo”, i referohej pretendimeve ruse se ata kishin pushtuar qytetin.

“Presidenti mohoi që Bahmut ishte marrë”, ka thënë Nykyforov.

Deklarata e presidentit ukrainas ka ardhur disa orë pasi ministria ruse e Mbrojtjes ka njoftuar se forcat e ushtrisë private Wagner, të mbështetura nga trupat ruse, kanë marrë Bahmutin.