Gjykata Supreme e Kosovës ka refuzuar si të pabazuar ankesën e subjektit politik Alternativa lidhur me ndarjen e mjeteve nga Fondi për Mbështetjen e Subjekteve Politike, bëhet e ditur

Alternativa kishte paraqitur ankesë në Supreme duke kundërshtuar ligjshmërinë e vendimit të Paneli Zgjedhor për Ankesa dhe Parashtresa (PZAP) dhe të Komisioni Qendror i Zgjedhjeve (KQZ) për caktimin e lartësisë së mjeteve nga ky fond për periudhën pas certifikimit të rezultateve të zgjedhjeve të parakohshme për Kuvendin e Kosovës, të mbajtura më 28 dhjetor 2025.

Ky subjekt politik kishte kundërshtuar faktin se nuk ishte përfshirë në ndarjen e këtyre mjeteve.

Megjithatë, Gjykata Supreme konstatoi se PZAP ka vepruar drejt kur e ka hedhur poshtë ankesën si të palejuar. Sipas arsyetimit të gjykatës, në bazë të Ligjit për Zgjedhjet e Përgjithshme në Republikën e Kosovës, PZAP ka kompetencë të shqyrtojë vetëm ankesat ndaj vendimeve të KQZ-së që janë të përcaktuara shprehimisht me këtë ligj.

Sipas vendimit, vendimet e KQZ-së që kanë të bëjnë me ndarjen e mjeteve nga Fondi për Mbështetjen e Subjekteve Politike nuk bëjnë pjesë në kategoritë e vendimeve që mund të ankimohen në PZAP.

Gjykata vlerëson gjithashtu se edhe Ligji për Financimin e Subjekteve Politike nuk parashikon të drejtën e ankesës ndaj vendimeve të KQZ-së për ndarjen e fondeve, përveç në rastet që lidhen me dispozitat ndëshkimore.

Megjithatë, sipas Gjykatës Supreme, edhe pse ankesa në PZAP nuk është e lejueshme për këtë kategori vendimesh, subjekti politik mund të kërkojë mbrojtje juridike përmes procedurave të tjera gjyqësore të parashikuara me ligj, përfshirë kontrollin gjyqësor të akteve përfundimtare të organeve publike.

/Kosovapress/