Rusia ka përshkallëzuar fushatat e saj hibride brenda kufijve të NATO-s në përgjigje të mbështetjes së unifikuar për sovranitetin dhe fitoren e Ukrainës, thuhet në raportin gjithëpërfshirës nga Komisioni i Helsinkit të SHBA-së të titulluar “Lufta në hije e Rusisë kundër NATO-s”.

Raporti thekson përdorimin e sulmeve kibernetike dhe sabotazhit fizik për të minuar infrastrukturën kritike, si spitalet, trenat dhe objektet e ujit, duke rrezikuar sigurinë publike dhe besimin në burimet jetike, transmeton KosovaPress.

Aty theks i veçantë i jepet përqindjes së operacioneve hibride ruse të dyshuara në periudhën shkurt 2022 - nëntor 2024.

“Sulmet e tilla, përfshirë ato ndaj sistemeve shëndetësore, kanë qenë të shpeshta në dy vitet e fundit, me përfshirjen e objekteve të kujdesit shëndetësor në Shtetet e Bashkuara dhe Rumani. Kjo ka çuar në ndërprerje të shërbimeve vitale dhe ka rritur shqetësimet për sigurinë e ujit të pijshëm, duke përfshirë infiltrimin në objektet e ujit në Teksas, Francë dhe Poloni.”

Sipas raportit, një tjetër shqetësim i ngritur është ndërhyrja e sinjalit GPS, që ka ndikuar në fluturimet evropiane dhe ka shkaktuar probleme në transportin ajror në rajonin Baltik.

Raporti gjithashtu vëren se Rusia përdor fushata hibride për të sfiduar stabilitetin dhe unitetin e NATO-s, duke përdorur taktika të lëvizshme që shmangin konfrontimin direkt ushtarak, por që janë po aq shkatërruese.

“Këto sulme synojnë të minojnë besimin e shoqërive të lira dhe të destabilizojnë Aleancën Perëndimore, që mbetet një pengesë kryesore për ambiciet perandorake të Moskës”, thuhet në raport.