Kryeministri i Shqipërisë, Edi Rama, ka reaguar lidhur me debatin për projektin e zhvillimit në zonën e Sazanit dhe Zvërnecit, duke theksuar se procesi administrativ është ndjekur me transparencë dhe është vlerësuar nga institucionet evropiane, raporton KosovaPress.

Përmes një statusi në Facebook, Rama deklaroi se Komisioni Evropian është njohur në detaje me të gjithë dokumentacionin dhe procedurat administrative që lidhen me projektin, derisa ka shpërndarë edhe një video ku komisionerja për Zgjerimin, Marta Kos, ka shprehur qartë qëndrimin e saj për këtë çështje.

Në videon që kryeministri shqiptar ka shëprndarë në Facebook, Kos ka theksuar se “Shqipëria ka bërë përparim të rëndësishëm në mbrojtjen e mjedisit”.

“Në baza të tilla, ne të gjithë duhet të punojmë mbi bazën e fakteve. Komisioni Evropian është në kontakt të vazhdueshëm me autoritet shqiptare, jo vetëm me kryeministrin Edi Rama... Sa i përket projektit në zonën Pishporo-Nartë, ashtu si për të gjitha projektet tjera në Shqipëri, ai do të duhej të jetë në përputhje me kuadrin ligjor, dhe me standardet e caktuara në kapitullin e mjedisit, Kapitulli 27 i procesit të anëtarësimit. Ky kapitull aktualisht është i hapur. Përpara se të mbyllet, situata duhet të sqarohet plotësisht, ndërsa mbyllja e tij parashikohet deri në fund të vitit 2027. Roli ynë do të jetë të verifikojmë nëse standardet janë përmbushur”, ka thënë Kos.

E deri atëherë, siç ka thënë ajo, autoritetet shqiptare dueht të të vazhdojnë të ndërmarrin hapat që mbështesin përmbushjen e standardeve në mbylljen e kapitullit dhe ndihmojnë Shqipërinë të ecë përpara në rrugën evropiane.

“Ne kemi marrë garanci nga Qeveria e Shqipërisë se do të kryhet një vlerësim i plotë i ndikimit në mjedis. Fakti që kjo po ndodhë ndërkohë që Shqipëria po kalon nëpër procesin e anëtarësimit është i rëndësishëm. Ky proces është juridikisht dhe politikisht detyrues dhe i nënshtrohet një monitorimi dhe vlerësimi  të vazhdueshëm. Prandaj, ai përbën garancinë më të fortë që natyra dhe mjedisi i Shqipërisë do të mbrohen në përputhje me standardet evropiane. Lidhur me këtë dëshiroj të shtoj se sa e rëndësishme për ne është e drejta ëpr të protestuar. Ajo është një e drejtë themelore, për Bashkimin tonë dhe për të gjitha vendet që dëshirojnë të bëhen pjesë e tij. Jam e lumtur të shoh që kjo e drejtë respektohet në Shqipëri”, ka thënë ajo para gazetarëve në një konferencë për media të hënën, kur edhe është pyetur lidhur me këtë çështje.

Rama u bëri thirrje kritikëve që t’u referohen dokumenteve zyrtare dhe fakteve konkrete, duke lënë të kuptohet se pretendimet kundër projektit nuk mbështeten në të dhëna të verifikuara.

Projekti i zhvillimit në zonën e Sazanit dhe Zvërnecit ka ngjallur debate të forta, ndërsa qeveria në Shqipëri këmbëngul se procedurat janë zhvilluar në përputhje me ligjin dhe standardet e kërkuara.

/Kosovapress/