Komuna e Prishtinës ka krijuar “Komisionin për Vlerësimin Emergjent të të gjitha vendpunishteve në territorin e Kryeqytetit”.

Këtë e bëri të ditur kryetari i Komunës së Prishtinës, Përparim Rama i cili paralajmëroi se do të mbyllen  të gjitha vendpunishtet tek të cilat evidentohen shkelje apo probleme serioze të sigurisë.

Sipas tij çdo inspektor komunal që nuk raporton çfarëdo parregullsie në teren do të mbahet përgjegjës.

“DO TË MBYLLEN TË GJITHA VENDPUNISHTET N’KRYEQYTET!

I shqetësuar me gjendjen aktuale në terren dhe me qëllim të rritjes së sigurisë publike, sot në mëngjes kam ftua drejtorët e Kryeqytetit dhe marrë vendim për krijimin e “Komisionit për Vlerësimin Emergjent të të GJITHA vendpunishteve në territorin e Kryeqytetit”

Ky komision, i përbërë nga ekspertë të fushës së

•urbanizmit

•inxhinierë të licencuar

•përfaqësues të emergjencave, do të fillojë menjëherë inspektimet në të gjitha vendpunishtet aktive në Kryeqytet.

Pas pranimit të këtij raporti, dua të jem shumë i qartë:

❌Të gjitha vendpunishtet ku evidentohen shkelje apo probleme serioze të sigurisë do të mbyllen menjëherë!

❌Ato do t’i nënshtrohen një analize të detajuar institucionale, e cila mund të rezultojë deri në revokim të lejes së ndërtimit!

❌ Çdo inspektor komunal që nuk ka raportuar çfarëdo parregullsie në terren do të mbahet përgjegjës.

Ftoj të gjitha subjektet ndërtimore që të bashkëpunojnë plotësisht me institucionet dhe të respektojnë ligjin.”, ka shkruar Rama n[ Facebook.

Të dielën në rrugën “Don Shtjefën Kurti”, është shembur dheu dhe si pasojë një pjesë e kryeqytetit kishte mbetur pa energji elektrike dhe ujë. Por, sot ekipet e KOSTT dhe ujësjellësit kanë dal në vendin e ngjarjes dhe problemet janë sanuar duke rikthyer energjinë elektrike dhe qarkullimin e ujit.

Ndërsa, Prokuroria Themelore e Prishtinës për këtë rast ka nisur hetime dhe tashmë është intervistuar personi përgjegjës i kompanisë “Klube Invest”.

Nga Prokurori Themelore e Prishtinës është bërë e ditur se tashmë është iniciuar një rast ndaj zyrtarëve përgjegjës të Komunës së Prishtinës, me qëllim të verifikimit nëse veprimet apo mosveprimet e tyre përbëjnë elemente të përgjegjësisë penale për kryerjen e veprës penale ‘’Keqpërdorim i pozitës apo autoritetit zyrtar’’, sipas nenit 414 të Kodit Penal të Republikës së Kosovës.

Komuna e Prishtinës për këtë rast ka pezulluar nga puna disa inspektorë. /B.Ibishi/