Qeveria e Kosovës ka mbajtur sot mbledhjen e saj të trembëdhjetë në format elektronik, ku ka shqyrtuar dhe miratuar disa vendime dhe nisma të rëndësishme.

Në këtë mbledhje, ekzekutivi ka miratuar Projektligjin për ndryshimin dhe plotësimin e Ligjit Nr.10/L-001 mbi Ndarjet Buxhetore për Buxhetin e Republikës së Kosovës për vitin 2026.

Po ashtu, është miratuar në parim nisma për lidhjen e Marrëveshjes së Kredisë ndërmjet Republikës së Kosovës, e përfaqësuar nga Ministria e Financave, dhe Agjencisë Franceze për Zhvillim, që lidhet me organizimin e Lojërave Mesdhetare 2030.

Qeveria ka aprovuar edhe Projektligjin për ndryshimin dhe plotësimin e Ligjit Nr.05/L-096 për Parandalimin e Pastrimit të Parave dhe Luftimin e Financimit të Terrorizmit.

Në kuadër të vendimeve të marra, kabineti qeveritar ka miratuar edhe propozimin për Kuvendin e Republikës së Kosovës të kandidatëve për shtatë (7) pozita të drejtorëve në Bordin e Agjencisë Kosovare të Privatizimit.

/Kosovapress/