Promovohet romani “Eskadronët e vdekjes”, dokumentohen krimet serbe në Kosovë
Lexohet për: 2 min.
1 vit më parë
Linku u kopjua
Lidhja e Shkrimtarëve e Kosovës (LShK) ka promovuar romanin “Eskadronët e vdekjes”, të autorit Bardhyl Mahmuti. Ky libër u vlerësua i domosdoshëm në Kosovë, pasi përmes rrëfimeve sjellën fakte të dokumentuara në lidhje me gjenocidin e Serbisë gjatë luftës së fundit në Kosovë.
Autori i librit, Bardhyl Mahmuti, tha se qëllimi i botimit të këtij libri ishte që të ndriçohet e vërteta e gjenocidit serb në Kosovë. Ai shtoi se preokupim i kahershëm i tij ka qenë që e vërteta e krimeve serbe në Kosovë të dokumentet, arkivohet dhe përkthehet në sa më shumë gjuhë të huaja.
“Preokupimi imi ka qenë se pse nuk ka shumë vepra tona që ndriçojnë të vërtetën, pasi s’ka nevojë të manipulohet dhe të gënjehet, mjafton vetëm të ndriçohet e vërteta por të ngurrohet. Ato vepra që janë shkruar nuk janë përkthyer dhe nuk janë shpërndarë, prandaj ka qenë një ndër preokupimet e mia...Tragjedia jonë, gjenocidi që është ushtruar ndaj nesh dallon në gjenocidin e ushtruar ndaj hebrenjve vetëm në numra, pasi në thelb gjenocidi siç përcaktohet në norma ndërkombëtare është çdo akt që ka për qëllim të shkatërroj një grup etnik, racor apo fetare dhe ne e kemi përjetuar atë gjenocid”, tha ai.
Ndërkaq, kryetari i LShK-së, Shyqri Galica, tha se këto romane i kanë munguar Kosovës, ku dokumentohen krimet serbe në Kosovë.
Në anën tjetër, poeti Xheladin Mjeku, tha se libri “Eskadronët e vdekjes”, ka rrëfime të ngjarjeve makabre të ndodhura në Kosovë gjatë luftës.
Promovimin e këtij romani e mirëpriten edhe shkrimtarë të tjerë, të cilët potencuan nevojën e dokumentimit më të madh të krimeve serbe në Kosovë.
