Problemet teknike me energjinë elektrike kanë lënë të ngujuar për disa orë 50 minatorë në minerën “Trepça” në Stan Tërg, derisa një pjesë e tyre tashmë kanë arritur të dalin nga aty.

Lajmin për KosovaPress e ka konfirmuar kryetari i Sindikatës së Minatorëve të Trepçës, Ibrahim Januzi.

“Sipas informatave që kemi, një pjesë e minatorëve kanë arritur të dalin”, deklaroi Januzi.

Edhe drejtori i minierës në Stan Tërg, Shyqyri Sadiku, ka konfirmuar rastin, duke bërë të ditur se minatorët kanë mbetur të bllokuar që nga ora 01:30 pas mesnate.

“Shumica kanë dalë. Aktualisht 18 minatorë janë ende brenda, por jemi duke punuar për të gjetur një zgjidhje alternative. 50 minatorë kanë qenë brenda”, tha Sadiku.

Ai shtoi se gjendja shëndetësore e minatorëve të ngujuar është stabile.

KosovaPress ka kontaktuar edhe menaxhmentin e “Trepçës” për më shumë detaje, por deri në publikimin e lajmit nuk ka marrë përgjigje.

Kjo nuk është hera e parë që minatorët në Stan Tërg përballen me situata të ngjashme.

Më 26 janar 2026, minatorët e ndërrimit të dytë në minierën “Trepça” kishin mbetur të ngujuar për 6 deri në 7 orë në ‘zgafellë’ për shkak të mosfunksionimit të liftit si pasojë e një defekti me energjinë elektrike.

Ndërsa më 11 janar 2026, pesë pompistë kujdestarë kishin mbetur të bllokuar për rreth nëntë orë në minierën e Stan Tërgut, po ashtu si pasojë e problemeve teknike me rrymën elektrike.

/Kosovapress/