Një këshilltar i licencuar për varësinë, Erik Fleming, pritet të dënohet të mërkurën për rolin e tij në vdekjen e aktorit Matthew Perry në vitin 2023.

Prokurorët kërkojnë 2.5 vjet burg, ndërsa mbrojtja vetëm 3 muaj burg dhe trajtim për varësi, duke theksuar bashkëpunimin e tij dhe rehabilitimin. Fleming, i cili është deklaruar fajtor për shpërndarje të ketaminës me pasojë vdekjeje, kishte lidhur Perry me shpërndarësen Jasveen Sangha, e njohur si “Mbretëresha e Ketaminës”, e dënuar më herët me 15 vjet burg.

Sipas hetimeve, Fleming siguronte ketaminë nga Sangha, e shiste me fitim dhe ia dorëzonte asistentes së Perry-t, i cili po kërkonte më shumë substancë për trajtim të depresionit jashtë kontrollit mjekësor. Pak ditë para vdekjes, Perry kishte marrë 25 flakonë për 6,000 dollarë. Më 28 tetor 2023 ai u gjet i vdekur në shtëpinë e tij në Los Angjelos; ekspertiza konfirmoi ketaminën si shkakun kryesor, sipas AP.

Fleming përballet me deri në 25 vjet burg, por pritet dënim më i ulët për shkak të bashkëpunimit me autoritetet, përcjell KosovaPress.