Policia e Kosovës ka hedhur poshtë pretendimet e Eparkisë Rashkë-Prizren se po ushtron presion, diskriminim apo frikësim ndaj pjesëtarëve të komunitetit serb dhe Kishës Ortodokse Serbe, duke i cilësuar ato si të pabazuara dhe të pambështetura në fakte.

Përmes një komunikate për media, Policia thekson se pretendimet nuk pasqyrojnë realitetin e veprimtarisë së saj dhe krijojnë një perceptim të rremë për mandatin dhe funksionimin e institucionit.

Sipas Policisë, institucioni është kushtetues dhe profesional, me përbërje shumetnike, ku shërbejnë zyrtarë nga të gjitha komunitetet, përfshirë edhe komunitetin serb, ndërsa çdo veprim policor ndërmerret vetëm në bazë të ligjit dhe përgjegjësisë individuale.

Policia rikujton se për më shumë se një dekadë ka garantuar zhvillimin e sigurt të qindra ceremonive fetare, pelegrinazheve dhe aktiviteteve të Kishës Ortodokse Serbe, në bashkëpunim me përfaqësuesit e Kishës, KFOR-in dhe institucionet tjera relevante.

Lidhur me ceremoninë e 28 qershorit 2026 në Gazimestan, Policia sqaron se ajo është zhvilluar sipas një plani të posaçëm operacional dhe pa ndërhyrje apo pengesa nga ana e saj. Sipas komunikatës, masat policore të ndërmarra pas përfundimit të ceremonisë nuk kanë qenë të drejtuara ndaj besimtarëve apo identitetit serb, por vetëm ndaj personave për të cilët ka pasur dyshime të arsyeshme për nxitje të urrejtjes, provokim ose cenim të rendit publik. Gjithashtu, theksohet se vendimet për gjoba, dëbim apo ndalim hyrjeje janë marrë nga organet kompetente administrative dhe gjyqësore, e jo nga Policia e Kosovës.

Në reagim, Policia nënvizon edhe angazhimin për mbrojtjen e trashëgimisë kulturore dhe fetare. Pas transferimit të përgjegjësive nga KFOR-i, ajo mori sigurimin e objekteve të trashëgimisë kulturore dhe fetare, ndërsa për këtë është themeluar Drejtoria për Sigurimin e Objekteve të Trashëgimisë Kulturore (DSOTK), ku mbi 16 për qind e pjesëtarëve i përkasin komunitetit serb dhe drejtori është major nga komuniteti serb.

Aktualisht, sipas Policisë, 24 objekte të trashëgimisë kulturore dhe fetare serbe ruhen 24 orë në ditë nga pjesëtarët e Policisë së Kosovës, ndërsa varrezat e të gjitha komuniteteve monitorohen në baza ditore.

Policia publikoi edhe statistika për rastet që kanë të bëjnë me objektet e trashëgimisë kulturore dhe fetare. Gjatë vitit 2024 janë evidentuar 53 raste, prej të cilave 64 për qind kanë ndodhur në objekte myslimane, 30 për qind në objekte ortodokse dhe 6 për qind në objekte katolike. Në vitin 2025 janë regjistruar 35 raste, ndërsa në periudhën janar-qershor 2026 janë evidentuar 34 raste, ku shumica dërrmuese lidhen me vjedhje dhe vjedhje të rënda.

Sa i përket rastit të përmendur nga Eparkia në një fshat të Podujevës, Policia njofton se më 21 maj 2025 është iniciuar rasti për veprën penale “Nxitje e përçarjes dhe mosdurimit”, ndërsa hetimet janë zhvilluar në koordinim me Prokurorinë dhe institucionet përkatëse lidhur me pretendimet për pronësinë e kishës.

Policia thekson gjithashtu se rastet me motive të mundshme ndëretnike kanë shënuar rënie të vazhdueshme, duke kaluar nga 31 raste në vitin 2023, në 25 raste në vitin 2024 dhe vetëm pesë raste gjatë vitit 2025.

Në fund, Policia e Kosovës rithekson se do të vazhdojë të ofrojë siguri për të gjitha komunitetet pa dallim dhe për objektet e trashëgimisë kulturore e fetare, duke ftuar qytetarët të vazhdojnë bashkëpunimin për ruajtjen dhe rritjen e sigurisë në vend.