Portieri legjendar i Meksikës, Guillermo Ochoa, ka njoftuar pensionimin nga futbolli profesionist, duke mbyllur një karrierë që zgjati më shumë se dy dekada.

41-vjeçari e konfirmoi vendimin të martën në rrjetet sociale, pak ditë pas paraqitjes së tij në Kupën e Botës së gjashtë në karrierë. 

"Dhashë gjithçka, lashë gjithçka në fushë për klubet dhe kombëtaren, dhe sot i var dorëzat", shkroi Ochoa. "Të jesh portier do të thotë të presësh 90 minuta për një moment të vetëm ku gjithçka varet nga ty. Dhe kur ai moment vjen, nuk mund të hezitosh."

Ochoa, i cili festoi 41-vjetorin javën e kaluar, kishte deklaruar më herët se Botërori 2026 do të ishte turneu i tij i fundit, edhe pse kishte spekulime se mund të firmoste me një klub të ri. 

Ai u përzgjodh në listën e Meksikës për gjashtë Kupa Bote, një numër që e ndan vetëm me ikonat Cristiano Ronaldo dhe Lionel Messi.

Ishte titullar në tre prej tyre: Brazil 2014, Rusi 2018 dhe Katar 2022. Në Botërorin 2026 ishte rezervë e Raul Rangel dhe hyri vetëm në 12 minutat e fundit të fitores 2-0 ndaj Çekisë në Azteca, duke marrë duartrokitje të gjata nga tifozët. 

Karriera e tij nisi në shkurt të vitit 2004 me Club America, ku kaloi shtatë sezone para se të transferohej te Ajaccio në Francë në vitin 2011, duke u bërë portieri i parë i lindur në Meksikë që luajti në Europë. Më pas luajti edhe në Spanjë me Malaga dhe Granada, në Belgjikë, Itali, Portugali dhe Qipro. 

Në postimin e tij lamtumirës, Ochoa falënderoi familjen dhe tifozët:

"Nuk e imagjinova kurrë se sa larg mund të më çonte një ëndërr. Sot vetëm mund të shikoj prapa me krenari dhe të them: FALEMINDERIT. Marr me vete dashurinë e miliona njerëzve dhe qetësinë se dhashë gjithçka për Meksikën. Atë që jetuam askush nuk mund të na e marrë".

KosovaPress