Partia Demokratike në Prishtinë ka kërkuar dorëheqjen e menjëhershme të këshilltarit komunal të Lëvizjes Vetëvendosje, Besnik Mujeci i cili u arrestua nga Policia e Shtetit në Tiranë në kuadër të operacionit antidrogë. Sipas shefit të asamblistëve të PDK-së në Prishtinë, Leutrim Retkoceri, droga e shpërndarë nga Mujeci e ka prejardhjen në Serbi.

Në një konferencë për media ka thënë se caktimi i Mujecit aksionar në ndërmarrjen publike Stacioni i Autobusëve nuk është i rastësishëm.

"Ky lloj i drogës i shpërndarë nga narkotrafikanti i Vetëvendosjes, Besnik Mujeci, prejardhjen e saj e ka në Serbi. Pra këta e kanë marrë drogën në Serbi dhe e kanë sjellë në Kosovë për ta dërguar në Shqipëri. Prandaj. PDK në Prishtinë, kërkon urgjentisht nga organet e rendit në Republikën e Kosovës që të nisin hetimet e menjëhershme për aferën droga në të cilën është përfshirë asambleisti i Vetëvendosjes”, ka thënë ai.

Lajmi i plotë është në sistemin me parapagim.

Këshilltari komunal i Prishtinës nga radhët e Lëvizjes Vetëvendosje, Besnik Mujeci, është pjesë e një grupi prej pesë personash të arrestuar nga Policia e Shtetit në Tiranë në kuadër të operacionit antridrogë “Punisher 2”.

Mujeci së bashku me personat e tjerë të arrestuar janë lokalizuar në kryqëzimin e rrugëve “Myslym Shyri” dhe “Sami Frashëri” në Tiranë së bashku me dërgesën me lëndë të dyshuar narkotike, prej 11 300 tabletash ekstazi MDMA, me peshë 5.093 kg dhe vlerë tregu rreth 400 mijë euro.

Përpos Mujecit, janë arrestuar edhe Mithat Ramadani 30 vjeç, Kalem Picari, 24 vjeç, Ambra Myftari 28 vjeçe, Daniel Avdija 26 vjeç.