Cenim të kushtetueshmërisë po e vlerëson Partia Demokratike e Kosovës mosemërimin e anëtarit të dytë të tyre në Komisionin Qendror të Zgjedhjeve.

Anëtari i Kryesisë së PDK-së, Betim Gjoshi, në një konferencë për media të martën kritikoi presidenten Vjosa Osmani, siç tha, për shkelje në këtë proces.

“Mosemërimi i përfaqësuesit të dytë të PDK-së në KQZ është kundërshtim me Kushtetutën e Kosovës. Opozita po përjashtohet nga roli i saj në administrimin e zgjedhjeve dhe mosbarazi ne KQZ”, tha ai.

Presidentja e Kosovës, Vjosa Osmani, i është drejtuar Gjykatës Kushtetuese për të sqaruar çështjen e emërimit të anëtarëve të Komisionit Qendror të Zgjedhor. Dilema kushtetuese, sipas kabinetit të presidentes Osmani, është pasi e njëjta ka pranuar më shumë propozime nga partitë politike të përfaqësuara në Kuvend sesa parashikohet me Kushtetutë.

Sipas burimeve të KosovaPressit, Lëvizja Vetëvendosje, si partia më e madhe në vend me mbi 51 për qind në zgjedhjet e fundit, ka propozuar tre anëtarë në KQZ. Partia Demokratike e Kosovës, e cila ka dalë e dyta në zgjedhje, ka propozuar dy anëtarë në KQZ, ndërkaq dy partitë e tjera shqiptare, LDK dhe AAK, kanë propozuar nga një anëtar, sikurse edhe partitë nga komunitetet jo shumicë.

/Kosovapress/