Presidenti rus Vladimir Putin deklaroi të enjten se Rusia do të forcojë mbrojtjen ajrore për t’iu kundërvënë sulmeve të fundit me dronë nga Ukraina, të cilat kanë depërtuar thellë në territorin rus dhe kanë hedhur hije mbi forumin ekonomik në Shën Petersburg.

Duke iu përgjigjur një pyetjeje të Associated Press gjatë një takimi me drejtues të agjencive ndërkombëtare të lajmeve, Putin pranoi dëmet e shkaktuara nga sulmet ukrainase, transmeton KosovaPress.

“Për fat të keq, disa prej tyre arrijnë të depërtojnë”, tha ai, duke shtuar se Rusia do të përmirësojë dhe forcojë sistemin e saj të mbrojtjes ajrore.

Putin gjithashtu tha se Moska është e hapur për kompromis lidhur me Ukrainën, në përputhje me mirëkuptimet e arritura gjatë takimit të tij me presidentin amerikan Donald Trump në Anchorage të Alaskës, duke shtuar se Kievi duhet t’i pranojë ato për të arritur një marrëveshje që do t’i jepte fund konfliktit, tashmë në vitin e pestë. Sulme me dronë në Shën Petersburg goditën bazën detare Kronstadt dhe një terminal nafte, duke shkaktuar tym të madh dhe ndërprerje fluturimesh në aeroport. Autoritetet ndërprenë edhe internetin celular për të penguar sulmet.

Sulmet tregojnë aftësinë në rritje të Kievit për të goditur thellë brenda Rusisë, ndërsa Rusia vazhdon sulmet ndaj qyteteve ukrainase, përfshirë Kievin.

Putin, në forumin ekonomik të Shën Petersburgut, tha se ekonomia ruse po rritet, por pranoi shqetësime për inflacionin.