Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka reaguar për mbulimin e tabelës me emrin e rrugës “Isa Boletini” në Mitrovicë të Veriut nga kryetari i kësaj komune, Milan Radojeviq.

Ajo kritikoi këtë veprim duke thënë se veriu i Kosovës është pjesë e Republikës së Kosovës dhe se vendosja e rendit dhe ligjit nuk duhet të vihet në diskutim pasi që sipas saj nuk është dhuratë e Rankoviqit.

“Ata që dikur as nuk arrinin të shkelnin në veri se lëre më të shtrijnë rend dhe ligj andej. E sot pikërisht këta na sillën si të brengosur me shtrirjen e rendit dhe ligjit andej. Eksponentë të kësaj nomenklature me veprimet e Listës serbe duan të godasin Qeverisjen tonë”, shkroi ajo.

Ajo në fund tha se “këta këtu siç duket i pengon shumë që më në fund në veri kemi rrugë me emrin ‘’Isa Boletini”.

Ndërkaq të mërkurën autoritetet e Kosovës kanë vendosur tabelat me emrat e rinj të rrugëve në Mitrovicën e Veriut, “Isa Boletini” dhe “Zoran Gjingjiq”. Por, kryetari i kësaj komune, Milan Radojeviq, i mbuloi ato me një pëlhurë të bardhë, duke deklaruar se vendimi për emërtimin e rrugëve është i paligjshëm.

Kujtojmë se punëtorët e Ministrisë së Infrastrukturës së Kosovës kanë vendosur sot tabelat me emrat e rinj të rrugëve në pjesën veriore të Mitrovicës, me asistimin e Policisë së Kosovës.

/Kosovapress/