Me prerjen solemne të shiritit është shënuar hapja e punimeve të projektit të përbashkët të Enos LLC dhe Kaptan Group, kompani të cilat synojnë të zhvillojnë projekte të mëdha ndërtimore dhe investuese në Kosovë, Shqipëri dhe rajonin e Ballkanit.

E ky projekt i madh i këtyre kompanive është projekti City Sky në Prishtinën e Re, i cili do të përfshijë 219 njësi banesore, mbi 3 mijë metra katrorë hapësira afariste dhe 313 vendparkime.

Gjatë ceremonisë u prezantua edhe një projekt tjetër kryesor në Prishtinë, kompleksi familjar Trimi Elite, me 90 njësi banesore dhe 195 vendparkime, ku një pjesë e konsiderueshme e sipërfaqes do t’i dedikohet gjelbërimit dhe hapësirave rekreative.

Në ceremoninë e organizuar në Prishtinë, drejtuesit e kompanive e cilësuan bashkëpunimin si bashkim të përvojës ndërkombëtare me inovacionin dhe vizionin modern për zhvillimin urban, duke theksuar se investimet e planifikuara synojnë të ndikojnë në transformimin e qyteteve dhe krijimin e hapësirave moderne të jetesës.

Pronari i Kaptan Group, Suleyman Kaptan, tha se kompania e tij po e sheh Ballkanin si një nga rajonet me potencialin më të madh për investime në vitet e ardhshme.

“Si kompani ndërtimi dhe investimesh, Kaptan Group për një kohë të gjatë ka punuar në Lindjen e Mesme, më saktësisht në Emiratet e Bashkuara Arabe dhe vendet e Gjirit. Por siç e dini të gjithë, bota po ndryshon dhe konflikte të reja po ndodhin në botë. Prandaj, sipas mendimit tim dhe mendimit të shumë biznesmenëve, besoj se ylli ndriçues i epokës së re do të jenë Turqia dhe Ballkani. Kjo është ajo në të cilën besojmë. Nëse mendoni për konfliktet në Emiratet e Bashkuara Arabe dhe në Lindjen e Mesme, atëherë kjo është arsyeja pse ne besojmë fuqishëm se ky rajon do të jetë ylli ndriçues. Kjo është një nga arsyet pse po i nisim këto projekte dhe këtë partneritet e investim”, tha Kaptan.

Sipas tij, partneriteti me Enos LLC, është rezultat i një vizioni të përbashkët për të ndërtuar projekte që do të krijojnë vlerë afatgjatë për rajonin.

“Por një tjetër arsye kryesore është partneri im, motivimi i tij, vizioni dhe puna e tij e palodhshme. Kështu që ne u bashkuam. Kemi shumë ngjashmëri dhe besojmë se kjo është koha dhe vendi i duhur. Prandaj ne e quajmë këtë “Transformation Vision Builder”. Kjo është arsyeja pse e quajmë ndërtues vizioni dhe po e sjellim këtë transformim në këtë rajon. Ne besojmë plotësisht se e ardhmja është këtu dhe besojmë plotësisht se kjo është koha dhe vendi i duhur për të bërë biznes në gjithë Ballkanin”, tha ai.

Ndërkaq, pronari i Enos LLC, Trim Musliu, tha se projekti që po nis nuk përfaqëson vetëm një kantier ndërtimi, por një investim afatgjatë për komunitetin dhe zhvillimin urban.

“Ne sot nuk po hapim vetëm një kantier ndërtimi. Sot po vendosim themelet të cilat do të jetojnë gjatë në këtë vend. Kur shumë njerëz në qytet shohin beton, ne shohim jetë. Kur shumë njerëz të tjerë shohin tokë, ne shohim qytet. Si pronari i Enos LLC ndihem krenar dhe pas shumë sakrificash, sfidash, dhe punës të pandalur, sot po e nisim një projekt që nuk do të jetë vetëm projekt ndërtimi, por simbol sinqeriteti, force, dhe besimi”, u shpreh ai.

Ai theksoi se projekti është rezultat i viteve të tëra pune dhe përkushtimi. Ndërkaq sipas tij, çdo projekt që mban emrin Enos ndërtohet me një parim: “fjala e dhënë duhet të mbahet deri në fund”.

“Dhe këtë rrugë nuk do ta ecim vetëm. Falënderoj secilin bashkëpunëtor, arkitekt, inxhinier, punëtor e mik që besoi në projektin tonë kur ai ishte vetëm në letër. Sot po fillon puna, por bashkë me të po fillon edhe një histori e suksesit. Faleminderit shumë edhe për partnerin tim, Mr. Suleyman Kaptan, për besimin. Falënderoj secilin partner që ka besuar këtij plani, këtij vizioni dhe ka ardhë me shumë të tjerë të investojë në projektet tona në Kosovë dhe në Shqipëri”, tha ai.

Përmes një video-mesazhi, zëvendëspresidenti i China British Technology Association, Daniel Lee, vlerësoi bashkëpunimin ndërmjet kompanive, duke i cilësuar ato si partnere të besueshme me vizion të qartë për zhvillimin e sektorit të ndërtimit në Ballkan.

“Së bashku ndajmë një vizion të mirë për të ndërtuar objekte të reja dhe moderne, si dhe për të furnizuar materiale moderne dhe miqësore me energjinë në gjithë rajonin e Ballkanit. Dhe ne jemi vërtet krenarë që kemi mundësinë të punojmë së bashku”, tha ai.

Ndërsa, përfaqësuesi i Lemon UAE Royal Co, Fahed Al Marhevi, vlerësoi angazhimin e Suleyman Kaptan dhe Trim Musliut në realizimin e projektit, duke shtuar se investime të tilla krijojnë mundësi të reja për zhvillim ekonomik dhe forcojnë urat e bashkëpunimit ndërmjet investitorëve ndërkombëtarë dhe Ballkanit.

“Nga toka e dashurisë dhe paqes, Emiratet e Bashkuara Arabe, vendi i bashkëjetesës, shtëpi e më shumë se 200 kombësive, pikëtakim kulturash dhe destinacion global për investime dhe turizëm, riafirmojmë mbështetjen tonë të plotë për projekte të tilla cilësore dhe besimin tonë të fortë në mundësitë për rritje dhe zgjerim në të gjithë rajonin e Ballkanit”, tha ai përmes një video mesazhi.

Në kuadër të planeve të ardhshme u prezantua edhe një projekt urban në Podujevë, i cili do të shtrihet në mbi 80 mijë metra katrorë dhe do të kombinojë banimin, biznesin, teknologjinë dhe argëtimin në një destinacion të vetëm modern.

Po ashtu, kompanitë prezantuan projektin “Lagoon Resort & Spa” në Tale të Lezhës, me rreth 200 mijë metra katrorë sipërfaqe zhvillimi. Projekti do të përfshijë hotele luksoze, përfshirë një hotel me pesë yje, marinë private dhe qindra njësi rezidenciale, me synimin për t’u shndërruar në një nga investimet më të rëndësishme turistike në rajon.

Kaptan Group është një kompani ndërkombëtare e ndërtimit dhe inxhinierisë, e themeluar në Stamboll në vitin 1992 nga inxhinieri Suleyman Kaptan. Kompania ka realizuar projekte në Arabinë Saudite, Irak, Sudan, Bahrein dhe vende të tjera të Lindjes së Mesme.

Ndërkaq, Enos LLC, e themeluar në vitin 2021, operon në sektorin e ndërtimit dhe zhvillimit urban në Kosovë dhe Shqipëri, me projekte në Prishtinë, Ferizaj, Podujevë dhe lokacione të tjera, duke u fokusuar në arkitekturën moderne, cilësinë premium dhe konceptet bashkëkohore të jetesës.