Zëvendëssekretarja e Përgjithshme e NATO-s, Radmila Shekerinska, ka ritheksuar mbështetjen e fuqishme të Aleancës për sovranitetin dhe integritetin territorial të Bosnjë dhe Hercegovinës gjatë një takimi me Presidencën e këtij vendi dhe Këshillin e Atlantikut të Veriut, të mërkurën në Bruksel

Ajo deklaroi se paqja dhe stabiliteti në Bosnjë dhe Hercegovinë, si dhe në gjithë Ballkanin Perëndimor, kanë rëndësi të veçantë për sigurinë euro-atlantike, thuhet në një njoftim të NATO-s, trasmeton KosovaPress.

Shekerinska mirëpriti vazhdimin e dialogut të nivelit të lartë ndërmjet Aleancës Veriatlantike dhe Bosnjë e Hercegovinës, duke vlerësuar partneritetin afatgjatë mes palëve.

Sipas saj, NATO është e gatshme të forcojë bashkëpunimin me shtetin ballkanin përmes Programit të Partneritetit të Përshtatur Individualisht dhe mbështetjes për ndërtimin e kapaciteteve mbrojtëse.

Ajo theksoi se reformat gjithëpërfshirëse të udhëhequra nga autoritetet e Bosnjë dhe Hercegovinës janë thelbësore për forcimin e institucioneve dhe sigurisë.

“NATO tashmë ofron mbështetje të fuqishme për reformat, por potenciali i plotë i tyre mund të arrihet vetëm nëse shoqërohet me një angazhim të besueshëm kombëtar, përfshirë ndarjen e një buxheti më të madh në mbështetje të Forcave të Armatosura të Bosnjë dhe Hercegovinës”, theksoi ajo, duke shtuar se “në botën e sotme më të rrezikshme, të gjithë duhet të investojmë më shumë në mbrojtjen dhe qëndrueshmërinë tonë, si aleatët e NATO-s ashtu edhe partnerët”.

Zyrtarja e NATO-s shtoi se Aleanca mbetet e përkushtuar në mbështetjen e rrugës evropiane dhe euro-atlantike të Bosnjë dhe Hercegovinës.