Kandidati për deputet nga Lëvizja Vetëvendosje, Naim Bardiqi, së bashku me kryeministrin në detyrë Albin Kurti, kryetarin e Komunës së Fushë Kosovës, Valon Prebreza, dhe nënkryetarin Shpend Bardiqi, kanë vizituar Klubin e Volejbollit “Fushë Kosova”, ku u njohën nga afër me sukseset e volejbollisteve të këtij ekipi.

Bardiqi tha se arritjet e sportisteve të klubit janë krenari për qytetin dhe frymëzim për gjeneratat e reja.

Sipas tij, KV “Fushë Kosova”, i themeluar në vitin 2011 dhe pjesë e Superligës së Kosovës që nga viti 2020, vazhdon të dëshmojë se puna, përkushtimi dhe investimi në të rinjtë sjellin rezultate konkrete.

Ai vlerësoi gjithashtu kontributin e klubit në zhvillimin e sportit dhe në furnizimin e përfaqësueseve të Kosovës me talente të reja.

“KV ‘Fushë Kosova’ vazhdon të dëshmojë se puna, përkushtimi dhe investimi në gjeneratat e reja sjellin rezultate, duke dhënë një kontribut të rëndësishëm edhe në përfaqësueset e Kosovës”, ka thënë Bardiqi.

Vizita u zhvillua në kuadër të aktiviteteve të tij në Fushë Kosovë.

/Kosovapress/