Komisioni për legjislacion po shqyrton propozimin e amendamenteve kushtetuese për zgjedhjen e presidentit nga populli.

Kryetari i komisionit, deputeti i PDK-së, Përparim Gruda tha se këto amendamente nuk mund të dërgohen në seancë, derisa paraqiti arsyet per një gjë të tillë.

“Amendamentet që na janë sjell janë dërguar në Gjykatë Kushtetuese në vitin 2011 dhe më 2012 Kushtetuesja ka vendosur. Jemi me shumë se një dekadë prapa dhe kemi tejkaluar çdo afat të shqyrtimit të atyre amendamenteve. Prandaj komisioni sot profesionalisht nuk mund të shqyrtojë amendamente kushtetuese një dekadë e më shumë përpara. Rregullorja thotë se shtatë ditë pas vendimit të kushtetueses”, tha ai.

Mirëpo, anëtari i komisionit nga radhët e LVV-së, deputeti, Adnan Rrustemi, tha se proceduralisht këto amendamente janë valide. Sipas tij, kjo do t’i shërbejë zhbllokimit të krizës politike, përderisa po mungon konsensusi për zgjedhjen e presidentit.

“Në aspektin procedural pala e autorizuar ka propozuar amendamentet që është presidentja e Republikës. E dyta, Gjykata Kushtetuese që duhet t’i vlerësojë paraprakisht në kuptimin e të drejtave dhe lirive të njeriut dhe ajo çka mbetet është votimi në seancë plenare pasi Komisioni ka dërguar… Kjo i shërben zhbllokimit të Republikës në një rrethanë kur mungon konsensusi politik për zgjedhjen e presidentit”, tha Rrustemi.

 Por Gruda insistoi se shqyrtimi i këtyre amendamenteve është shkelje e afateve dhe Rregullores së Kuvendit.

“Shkelje e afatit dhe çdo parimi të ndryshimeve kushtetuese dhe nuk mundem me bërë një procedurë”, tha ai.

Atij i replikoi deputeti tjetër i LVV-së, Vigan Qorrolli, i cili tha se këto amendamente janë valide dhe duhet të miratohen në seancë.

“Në emër të LVV-së paraqes qëndrimin se aktgjykimi i vitit 2012 është valid dhe kërkojmë që këto marrëveshje të dërgohen për seancë parlamentare”, tha ai.

Ndërsa, deputetja e PDK-së, Blerta Deliu, tha se Kushtetuta nuk mund të ndryshohet për interesa personale të askujr.

“Për mua ëshrë e çuditshme pse në këtë kohë, 14 vjet pas afateve kushtetuese dhe në përmbyllje të afatit për zgjedhje të presidentit. Kushtetuta nuk mund të ndryshohet për interesa personale të askujt”, tha ajo.

Ndërsa, deputetja e LDK-së, Jehona Lushaku, u shpreh kundër miratimit të këtyre amendamenteve.

“Kjo nuk është një rrugëzgjidhje e natës së sotme dhe urgjencës që këto të procedohen. Reformat kushtetuese kërkojnë kohë dhe analizë”, tha ajo.

/Kosovapress/