Në kuadër të përballjes historike Kosovë-Turqi, e vlefshme për kualifikim në Kampionatin Botëror 2026, delegacioni turk ka arritur në Kosovë dhe po duke mbanë konferencë për media.

Trajneri i Kombëtares së Turqisë, Vincenzo Montella, në konferencën e mbajtur për media në kuadër të përballjes mes Kosovës dhe Turqisë, është shfaqur i vendosur dhe plot respekt për kundërshtarin.

Montella vlerësoi maksimalisht rrugëtimin e Kosovës, duke theksuar se përfaqësuesja vendase ka arritur me plot meritë në këtë fazë. Sipas tij, ndeshja e së martës do të ketë karakter finalje dhe pritet të jetë një duel i fortë mes dy ekipeve.

“Kosova me plotë meritë ka ardhur deri këtu. Nesër besoj se do të jetë një finale e madhe” - u shpreh ai.

Trajneri italian gjithashtu tregoi besim të plotë tek skuadra e tij, duke nënvizuar se rezultati i ndeshjes nuk do të ndikojë në vlerësimin që ka për lojtarët.

“Cilido qoftë rezultati i ndeshjes me Kosovën, mendimet e mia për lojtarët e mi nuk do të ndryshojnë kurrë. Nuk do t’i ndërroja për asgjë” - deklaroi Montella.

Megjithatë, ai pranoi se presioni do të jetë i pranishëm në një ndeshje të tillë, por mbetet optimist për paraqitjen e ekipit të tij.

“Është një finale e madhe, do të ketë presion, por do ta kalojmë” - përfundoi trajneri i Turqisë.

Ndeshja ndërmjet Kosovës dhe Turqisë pritet me interes të madh dhe konsiderohet si një nga përballjet më të rëndësishme për të dyja kombëtaret në rrugëtimin drejt Botërorit 2026.

KosovaPress