Kosova mund të përfitojë jashtëzakonisht shumë me politikën pragmatiste të presidentit të sapozgjedhur të Shteteve të Bashkuara të Amerikës, Donald Trump, thonë njohësit e marrëdhënieve ndërkombëtarë. Sipas tyre, politika amerikane nuk pritet të ndryshojë ndaj Kosovës, por mund të ndryshojnë metodat për zbatimin e marrëveshjeve për normalizimin e marrëdhënieve me Serbinë. Megjithatë, konsiderohet se individë të caktuar të skenës politike në Kosovë mund të “sanksionohen” nëse nuk i përshtaten dinamikës së re të politikës amerikane.
Profesori i marrëdhënieve ndërkombëtare, Dritëro Arifi, thotë për KosovaPress se ‘nëse Kosova është e zgjuar dhe zhdërvjelltë’ mund të përfitojë shumë nga politika e presidentit amerikan, Donald Trump.Sipas saj, Trump do të jetë më i vendosur në realizimin e marrëveshjeve në kuadër të dialogut, posaçërisht marrëveshjes së Uashingtonit, të arritur gjatë periudhës së tij në vitin 2020.
Në anën tjetër, profesori Arifi, konsideron se me Trump president do të ndryshojë dinamika e dialogut, pasi shton se ai do të kërkojë rezultate konkrete dhe me afate kohore të përcaktuara në këtë proces.Në garën e 5 nëntorit ishin demokratja Kamala Harris, aktualisht zëvendëspresidente e Amerikës dhe republikani Donald Trump, i cili ishte president nga viti 2017 deri më 2021.
Ndërkaq, fitoren e Trumpit e kanë përshëndetur lider botërorë. Edhe në Kosovë Trumpi u urua nga liderë institucional e partiak.
