Ministria e Industrisë, Ndërmarrësisë, Tregtisë dhe Inovacionit (MINTI) bën të ditur se ka përcjellë me vëmendje zhvillimet e fundit lidhur me çështjen e njehsorëve elektrikë dhe pretendimet për keq llogaritje.

Sipas njoftimit të MINT, me qëllim të garantimit të transparencës, korrektësisë dhe mbrojtjes së interesave të qytetarëve, dhe duke u bazuar në Ligjin Nr. 06/L-034 për Mbrojtjen e Konsumatorit, në kuadër të përgjegjësive të Departamentit për Mbrojtjen e Konsumatorit, me datë 31.03.2026, është themeluar një komision i posaçëm për verifikimin e njehsorëve elektrikë.

MINTI e njofton opinionin publik se deri më tani nuk është pranuar asnjë ankesë nga konsumatorët lidhur me dyshime për keq llogaritje të njehsorëve. Megjithatë, duke filluar nga data 01.04.2026 (e mërkurë), komisioni do të dalë në terren për të verifikuar njehsorët elektrikë të çdo konsumatori që paraqet ankesë.

“Me këtë rast, MINTI u bën thirrje të gjithë qytetarëve të Republikës së Kosovës, të cilët janë shfrytëzues të energjisë elektrike, që për çdo dyshim lidhur me funksionimin e parregullt të njehsorëve në objektet e tyre të banimit, të njoftojnë Departamentin për Mbrojtjen e Konsumatorit, në numrin pa pagesë 0800 11000, ose përmes adresës elektronike: [email protected]”, thuhet në njoftim.

Në fotografinë e mëposhtme është paraqitur një model se si mund të verifikoni njehsorin (orën) e energjisë elektrike në ndërtesat tuaja.

MINTI mbetet e përkushtuar në mbrojtjen e të drejtave të konsumatorëve dhe në sigurimin e një tregu të drejtë dhe transparent.

Sa i përket çështjes së njehsorëve që janë ngritur shqetësime kryesuesi i Bordit të ZRRE-së, Ymer Fejzullahu i tha KosovaPress-it se kjo është përgjegjësi e Institutit të Meteorologjisë, i cili funksionon në kuadër të ministrisë së Tregtisë.

“Instituti i Meteorologjisë në kuadër të ministrisë së Tregtisë, ata janë përgjegjës për këtë punë. Për çdo gjë që është me matje me ligj e kanë detyrim “, deklaroi Fejzullahu.

Dje, anëtari i Lidhjes Demokratike të Kosovës, Visar Azemi, ka dorëzuar në Zyrën e Rregullatorit të Energjisë (ZRRE) qindra dëshmi të pretenduara për manipulim me njehsorët e energjisë elektrike, për të cilat ai ka thënë se po i bëhen qytetarëve të vendit, raporton KosovaPress.

/Kosovapress/