Presidentja e Meksikës, Claudia Sheinbaum, ka garantuar se ceremonia e hapjes së Kampionatit Botëror këtë të enjte do të zhvillohet në qetësi të plotë, pavarësisht tensioneve dhe protestave të dhunshme që kanë përfshirë kryeqytetin.

Sindikata e mësuesve ka kërcënuar me demonstrata masive pikërisht gjatë ndeshjes hapëse mes Meksikës dhe Afrikës së Jugut, duke kërkuar rritje pagash dhe reforma në pensione.

Ditët e fundit, situata ka qenë e tensionuar: policia ka përdorur gaz lotsjellës, mësuesit kanë rrëzuar statuja përkujtimore të futbollistëve, ndërsa autoritetet zbuluan 59 mjete shpërthyese artizane në një nga autobusët që hynte në qytet.

Pavarësisht kësaj situate, Presidentja Sheinbaum u shpreh e vendosur në konferencën e saj për shtyp:

"Ne do të garantojmë... që festimi i Kupës së Botës të jetë i mirëorganizuar, në paqe dhe në qetësi."

Nga ana tjetër, protestuesit e shohin këtë ngjarje madhore si mundësinë ideale për t'i bërë presion qeverisë.

Mësuesja 42-vjeçare, Dinora Diaz, deklaroi:

Botërori është "momenti ideal për të gjeneruar presion" për të fituar lëshime nga qeveria.

Ndërsa qeveria ka ofruar disa propozime, si krijimin e një kompanie të re shtetërore për pensionet, ajo ka refuzuar të shfuqizojë ligjet aktuale me arsyetimin se kjo do të kushtonte rreth 400 milionë dollarë.

Sekretarja e Qeverisjes, Rosa Icela Rodriguez, bëri thirrje për ndërprerjen e bllokadave, duke thënë:

"Është thelbësore që ushtrimi i ligjshëm i së drejtës për të protestuar të bashkëjetojë me të drejtat e atyre që jetojnë dhe lëvizin në këtë qytet të madh."

Përveç mësuesve, protestave u janë bashkuar edhe qindra njerëz që kërkojnë drejtësi për zhdukjen e 43 studentëve në vitin 2014, duke bërë që zonat e tifozëve (Fan Zones) të rrethohen me barriera metalike dhe bizneset lokale të ankohen për largimin e turistëve të trembur.

KosovaPress