Mehmetit i plotësohet ëndrra të luaj për Shqipërinë: Shkojmë për fitore në Poloni
Në konferencën e sotme për media të Kombëtares së Shqipërisë, përveç Myrto Uzunit u paraqit edhe Anis Mehmeti, i cili luan për skuadrën e Bristol Cityt në Championshipin anglez.
Mehmeti u shpreh se ftesa nga Kombëtarja e Shqipërisë tashmë është një ëndërr e realizuar, dhe se objektivi për ndeshjen ndaj Polonisë është fitorja, raporton KosovaPress.
“Është ëndërr për mua dhe për familjen që të luaj për Kombëtaren shqiptare dhe të vesh fanellën kuqezi”, tha Mehmeti.
“Jam gati që të luaj nga minuta e parë në Poloni dhe të jem pjesë e formacionit titullar. Shkojmë në Poloni me qëllimin për të fituar. Kemi skuadër shumë të fortë dhe gjithë ata lojtarë që luajnë për kampionat janë shumë të fortë dhe po, besoj që do shkojmë në Poloni për të fituar”, shtoi më tej Mehmeti.
Po ashtu, Mehmeti analizoi edhe Kombëtaren e Polonisë, të cilën e cilësoi skuadër shumë të fortë.
“Polonia ka një skuadër shumë të fortë, por ne jemi të përqëndruar tek ajo që do bëjmë ne në fushë. Ata kanë Lewandowskin, por ne jemi gati të luajmë lojën tonë”, tha Mehmeti.
Kombëtarja e Shqipërisë do të zhvillojë ndeshjen kundër Polonisë si mysafire më 27 mars në Varshavë.
