Qumështorja “Vita” në Istog u mbyll, të enjten, pas vendimit të marrë nga vetë kompania.

Drejtori gjeneral i Qumështores, Artan Spahija, la të kuptohet se fajtor për këtë gjë është ministri i Bujqësisë, Armend Muja ndërsa shtoi se ai dhe tjerët që punojnë e mbajnë Vita-n nuk do të dorëzohen kurrë.

“Ministri i cili më shumë e do Serbinë, më shumë sesa neve. Do më shumë me hy qumështi prej Serbisë në Maqedoni, e me u fut në Kosovë, sesa qumështi i “Vitës”. Ne nuk jemi kriminela, ne kemi me shku faqebardhë, edhe na nuk kemi me u dorëzu, këta munden me kry procedurën e vet, por ne juve nuk ju lëjmë”, tha ai në një prononcim pas mbylljes së qumështores.

Ai u premtoi punëtorëve të “Vita”-s se kompania nuk do t’i lë pas dore, duke iu dhënë fjalën se paga e tyre do të dalë.

“Ne kemi prodhime tjera, ne kemi me vazhdu, nuk munden me na ndalë. Nuk ka mujt as Serbia me na ndal. Ju mos keni merak, rrogat ja’u qesim, dhe ne nuk dorëzohemi”, tha drejtori i  qumështores “Vita”.

Nga ana tjetër, ministri në detyrë i Bujqësisë, Pylltarisë dhe Zhvillimit Rural, Armend Muja bëri një njoftim në Facebook lidhur me atë që ndodhi në “Vita”, duke e lidhur këtë zhicllim me sic tha, kontrollet zyrtare që Agjencia e Ushqimit dhe Veterinarisë (AUV) po zhvillon në sektorin e qumështit dhe produkteve të qumështit. Ai shkroi se mbrojtja e konsumatorit dhe zbatimi i legjislacionit për sigurinë ushqimore janë përgjegjësi institucionale dhe nuk mund të jenë objekt i përjashtimeve apo standardeve të dyfishta.

Sipas Mujës, kontrollet që po zhvillon AUV-ja janë pjesë e mandatit të saj të rregullt ligjor për mbikëqyrjen e zbatimit të Ligjit për Ushqimin dhe standardeve të sigurisë ushqimore.

“Në kuadër të këtyre aktiviteteve, gjatë ditës së sotme është realizuar kontroll zyrtar edhe në kompaninë “Vita”, njësoj si ndaj çdo operatori tjetër ekonomik që i nënshtrohet mbikëqyrjes institucionale. “Qytetarët tanë duhet të dinë se çka hanë e çka pinë, për produktet për të cilat paguajnë. Siguria ushqimore kërkon zbatim të barabartë të ligjit për të gjithë. Kontrollet nuk bëhen ndaj emrave të kompanive, por mbi bazën e mandatit ligjor. Askush nuk mund të jetë mbi ligjin”, shkroi Muja, ndër tjera.

Ai shtoi se Agjencia e Ushqimit dhe Veterinarisë ushtron të njëjtin mandat në të gjitha segmentet e industrisë ushqimore dhe se kontrollet zyrtare zhvillohen ndaj operatorëve ekonomikë pa dallim sektori, madhësie apo pozite në treg, duke garantuar zbatim të njëjtë të ligjit për secilin subjekt.

/Kosovapress/