Kryetari i Vetëvendosjes, Albin Kurti, ka fajësuar partitë opozitare për çështjen e presidentit. Kurti në seancën e jashtëzakonshme ku po diskutohet për zgjedhjen e presidentit, tha se opozitarët kanë pasur qasje destruktive në këtë proces, raporton KosovaPress.  

Sipas tij, oferta e tyre e fundit karshi PDK-së dhe LDK-së për propozimin e tri kandidatëve për president ka qenë gjeneroze, mirëpo të njëjtat zgjodhën heshtjen.

“Gjithmonë është dashur unë ti ftoj në takime që të diskutojmë. Këto takime përveçse nuk i ftonin ata nuk patën as propozime konkrete prej tyre. Në mungesë të propozimeve konkrete ne propozuam kandidatët tanë. Kur kandidatët tanë u refuzuan ne hoqëm dorë dhe i ofruam opozitës të zgjedhë tre kandidatë konsensual. Kjo ofertë ka qëndruar për shumë kohë të mjaftueshme për të përgjigjur, mirëpo nuk kemi pranuar ende asnjë propozim.. Në këtë sallë e jashtë saj në studio televizive me zë të lartë pretendojnë se Vetëvendosje po i kap të gjitha pozitat, por që kur iu ofrua mundësia konkrete kanë zgjedhur heshtjen”, tha Kurti.

Në një fjalim të gjatë rreth 42 minutash, Kurti tha se problemi nuk janë ofertat e kandidatët.

Ai ceku edhe se po të vihej në sprovë VV-ja ka emra ndërmend, poqë opozita nuk i testoi ata.

Sipas tij, qëllimi është të dëmtohet Vetëvendosja, në mënyrë që të ketë sa më pak mandate.

“Paramendojeni po të na vinin ata në sprovë neve me tre emra. S’po dua të ju testojë tash çfarë emrash kam unë ndërmend. Kanë mundur t’i sjellin tre emra dhe të na testojnë. Por, nuk kanë qenë të interesuar sepse s’kanë qenë asnjëherë me interesim për hapa përpara. Nuk ka pasur as emra, as kundër oferta, dhe as nuk po shfrytëzohet kjo ofertë. Kjo mungesë e trefishtë lë vetëm një shpjegim të mundshëm, që problemi nuk janë ofertat por kandidatët. Problemi është që nuk ka respekt ndaj verdiktit të popullit, nuk po respektohet rezultati i zgjedhjeve. Njëjtë si vitin e kaluar, qëllimi është që të dëmtohet Vetëvendosje si fituese, ashtu që të ketë sa më pak mandate dhe sa më shumë të duket që Kosova nuk është vend stabil në kuptimin institucional”, deklaroi ai.

Kryeministri Albin Kurti i është lutur deputetëve të partive opozitare për të ardhur në Kuvend dhe votuar siç ka thënë presidentin konsensual.

“Aman na ndihmoni që të mos i kemi tri pozita. Boll na dalin dy pozita, nuk i duam tre pozita. Të dashur deputetë të opozitës ejani të votojmë presidentin konsensual”, tha Kurti.

Sipas tij, ofertë më gjeneroze se ajo e LVV-së karshi PDK-së dhe LDK-se për zgjedhjen e presidentit nuk ka askund në Evropë, ndoshta edhe në botë.

/Kosovapress/