Prokurori i Shtetit ka angazhuar mbi 100 prokuror të shtetit dhe zyrtarë të sistemit prokurorial për ta mbrojtur votën e lirë të qytetarëve, dhe duke garantuar integritetin e procesit zgjedhor të 7 qershorit.

Përmes  një njoftimi Zyra e Kryeprokurorit të Shtetit ka deklaruar se  për zgjedhjet e parakohshme për Kuvendin e Republikës së Kosovës,  të cilat do të mbahen të dielën më 7 qershor 2026, Prokurori i Shtetit ka bërë të gjitha përgatitjet e nevojshme për të realizuar mbrojtjen e votës së lirë të qytetarëve, duke garantuar integritetin e procesit zgjedhor, raporton KosovaPress.

“Në këto zgjedhje janë angazhuar së bashku mbi 100 prokurorë të shtetit dhe zyrtarë të sistemit prokurorial, të cilët do të qëndrojnë kujdestarë në gjithë territorin e Republikës së Kosovës, deri në përfundim të procesit zgjedhor, me qëllim të procedimit të çdo parregullsie që mund të ndodhë në këto zgjedhje”, thuhet në njoftim.

Prokurori i Shtetit i ka ftuar të gjithë  qytetarët e Republikës së Kosovës, të gjitha subjektet politike, institucionet apo organizatat e ndryshme, që të denoncojnë tek prokuroritë përkatëse, çdo rast, për të cilin kanë dyshime se po keqpërdoret ose manipulohet vota në çfarëdo mënyre dhe nga kushdo qoftë.

/Kosovapress/