Lot gëzimi, përqafime dhe duartrokitje e shoqëruan ceremoninë e diplomimit të dymbëdhjetë kadetëve të gjeneratës 2026 të Forcës së Sigurisë së Kosovës.

Në tribunë, shumë familjarë u panë me lot në sy nga krenaria teksa shihnin fëmijët e tyre të merrnin diplomat dhe të nisnin rrugëtimin si oficerë të rinj të FSK-së.

Pas ceremonisë, emocionet u ndanë mes kadetëve dhe prindërve të tyre, të cilët e përshkruan këtë ditë si kurorëzim të viteve të përkushtimit dhe sakrificës, por edhe si fillimin e një përgjegjësie të re në shërbim të Kosovës.

Mes duartrokitjeve të gjata, emri i Dardan Syles u thirr edhe një herë, kësaj radhe si kadeti më i dalluar i gjeneratës 2026. Përveç diplomës, ai mori edhe vlerësimin më të lartë të gjeneratës, një moment që u shoqërua me emocione të forta si për të, ashtu edhe për familjen e tij.

E emocionet ishin edhe më të mëdha për babanë e tij, Safet Sylen, ish-pjesëtar i Ushtrisë Çlirimtare të Kosovës, i cili e ndoqi me krenari momentin kur djali i tij u shpall më i dalluari i gjeneratës.

Ai për KosovaPress tha se kjo nuk ishte vetëm një ditë feste për familjen e tij, por edhe një kujtim i amanetit të dëshmorëve për ndërtimin e një ushtrie profesionale.

Me emocione të ngjashme foli edhe kadeti Jahir Fazliu, i cili për KosovaPress, tha se dita e diplomimit është shpërblimi i katër viteve plot sfida.

Në përfundim të ceremonisë, shumë kadetë u panë duke përqafuar familjarët e tyre, ndërsa Bafti Nazifi mbante në duar flamurin e UÇK-së, simbol që, sipas tij, e kishte frymëzuar përgjatë gjithë rrugëtimit drejt uniformës së FSK-së.

Ndërkaq me betimin për t’i shërbyer Republikës së Kosovës 12 kadetë të gjeneratës 2026, në mesin e të cilëve vetëm një vajzë, u diplomuan sot si oficerë të rinj të Forcës së Sigurisë së Kosovës, raporton KosovaPress.

/Kosovapress/