Ambasadori i Gjermanisë në Prishtinë Jorn Rohde dhe shefi i Zyrës së BE-së në Kosovë Tomas Szunyog kanë shprehur keqardhje pas miratimit të Ligjit të ri për Komisionin e Pavarur të Mediave, duke thënë se Kuvendi i Kosovës me këtë ka injoruar rekomandimet paraprake të BE-së.

“Kosovarët duan të jenë pjesë e familjes së BE-së dhe nëse Qeveria e Kosovës dëshiron të përshpejtojë rrugën e saj drejt BE-së, çdo ligj i ri duhet të jetë plotësisht në përputhje me standardet BE. BE, KiE dhe OSBE kanë dhënë opinionet e tyre për ligjet, por janë injoruar...”, ka shkruar Rohde në një status në X.

Ndërsa, ambasadori i BE-së ka thënë se Kuvendi i Kosovës sot humbi mundësinë për të pasur dy ligje të mira, Ligjin e ndryshuar për Këshillin Prokurorial të Kosovës dhe Ligjin për Komisionin e Pavarur të Mediave, duke dështuar në inkorporimin e plotë të rekomandimeve të BE-së dhe organizatave të tjera ndërkombëtare.

Ligji për KPM, OSBE: Ka implikime të mundshme për lirinë e shprehjes • KosovaPress

“Në fund të fundit, ligjet e mira nuk kanë të bëjnë vetëm me rrugën e Kosovës drejt BE-së. Ato kanë të bëjnë me sigurimin e sundimit të ligjit, drejtësisë dhe mbrojtjes së qytetarëve. Na vjen keq që Kuvendi nuk arriti t'i trajtojë këto shqetësime kryesore dhe të përafrohet me standardet e BE-së dhe evropiane”, ka shkruar Szunyog në rrjetin X.