Sot është lansuar pilotimi i Programit të Kuponëve, në kuadër të Projektit “Edukimi dhe kujdesi në fëmijërinë e hershme për kapitalin njerëzor të Kosovës”. Përmes këtij programi synohet rritja e përfshirjes në edukim të fëmijërisë të hershme për tri kategori të fëmijëve. Fëmijët e përfshirë janë fëmijët e familjeve me asistencë sociale, me nevoja të veçanta si dhe të komuniteteve romë, ashkalinj dhe egjiptian.

Fillimisht ky pilotim përfshinë komunën e Prishtinës, Lipjanin, Gjilanin dhe Prizrenin me synim që brenda pak muajsh të shtrihet në gjithë komunat e Kosovës.

Kryeministri i Kosovës, Albin Kurti u shpreh se përmes këtij programi synohet mbështetje e drejtpërdrejtë për fëmijët e familjeve nga skema sociale.

Duke shtuar se edukimi i hershëm rezulton me individë të suksesshëm, Kurti theksoi se programi do të mbuloj pagesën për çerdhe dhe transporte.

Sipas tij kërkesa zyrtare për këtë projekt është bërë që në dhjetorin e vitit 2022, ndërsa marrëveshja e finalizuar është nënshkruar më 28 qershor 2024.

Ministrja e Arsimit, Shkencës, Teknologjisë dhe Inovacionit, Arbëri Nagavci tha se me lansimin e këtij programi po hedhet hapi i parë konkret për mbështetje për fëmijët e familjeve me asistencë sociale për mundësinë në qasje në edukim të hershëm.

Sipas saj programi pritet të përmirësoj dukshëm qasjen e barabartë në shërbimet e arsimit dhe kujdesit në fëmijërinë e hershme për fëmijët nga familjet me status të ulët socio-ekonomik.

Zëvendësdrejtoresha e Bankës Botërore për Kosovë dhe Maqedoninë e Veriut, Jane Millicent Sprouster tha se programi synon të përmirësoj qasjen në arsimin e hershëm për fëmijët e moshës 3-5 vjeç.

Në korrik të vitit 2023 Kuvendi i Kosovës ka miratuar Ligjin për Edukimin në Fëmijërinë e Hershme, me të cilin rregullohet ofrimi i edukimit cilësor në të gjitha format e organizimit të edukimit për më të vegjëlit, prej lindjes deri në moshën 6 vjeçare. Me këtë ligj, Edukimi Parafillor bëhet i obliguar.

Lajmi i plotë në sistemin me parapagim...