Shefja e Grupit Parlamentar të Lëvizjes Vetëvendosje, Mimoza Kusari-Lila është e kënaqur me punën e Kuvendit të Kosovës në sesionin pranveror. Pasi deputetët shkuan në pushime verore, Kusari-Lila thotë se në këtë sesion kanë miratuar projektligjet që kanë qenë bosht i programit zgjedhor të Lëvizjes Vetëvendosje. Megjithatë, ajo e pranon se legjislativi s’ka pasur konsistencë në punën e vet, derisa e kritikon opozitën, veçmas PDK-në për përdorimin e dhunës në Kuvend.

Kusari-Lila për KosovaPress thotë se Kuvendi ka miratuar rreth 44 projektligje, ndërsa rreth 50 sosh janë në procedurë të rregullt.

Shefja e deputetëve të LVV-së në një intervistë për KosovaPress flet edhe për audio-incizimet, ku dëgjohet ajo duke folur me ish-deputetin e Listës Serbe, Sllavko Simiq, kontestimin në Gjykatën Kushtetuese të seancës së “dajakut” më 13 korrik dhe kërcënimet e veteranëve se nuk do t’i lejojnë të hyjnë në Kuvend në shtator, pas përjashtimit të tyre nga paga minimale.

Krahas kësaj, Kusari-Lila është e bindur se s’ka asnjë bazë për kthimin në pikën zero të seancës së 13 korrikut, kur u miratua edhe rritja e pagës minimale.

Duke folur për audio-incizimet, Kusari-Lila paralajmëron kallëzim penal ndaj ish-deputetit Simiq.

Ajo thotë se qëllimi ka për të shkaktuar përçarje brenda koalicionit qeverisës, por thekson se ka marrë mbështetje të plotë nga kryeministri Albin Kurti dhe deputetët e LVV-së.

Megjithëse, Kuvendi ka shkuar në pushim deri në javën e dytë të muajit shtator, Kusari-Lila paralajmëron veteranët e UÇK-së se nuk mund t’i ndalojnë deputetët të hyjnë në Kuvend, pavarësisht arsyeve që mund t’i kenë.

Sipas saj, po punojnë që deri kur fillon sesioni vjeshtor i Kuvendit të gjejnë një zgjidhje me veteranët, pas kundërshtimeve të tyre për anashkalim nga rritja e pagës minimale./E.Zeqiri

Lajmi i plotë është në sistemin me parapagim.

https://kosovapress.com/admin/ska-kuorum-per-te-filluar-seanca-e-kuvendit-deputetet-shkojne-ne-pushim/