Kryeministri i Kosovës, Albin Kurti ka deklaruar se disa institucione të Kosovës me web faqe të tyre kanë rënë pre e sulmeve kibernetike ruse për një periudhë të caktuar dhe më pas janë rikthyer. Sipas tij, synimi i Federatës ruse është lufta hibride, e cila ka për qëllim destabilizimin e institucioneve të shtetit të sigurisë, të stabilitetit dhe mbarëvajtjes së punëve.
Në konferencën për media, pas mbajtjes së mbledhjes së Qeverisë, kryeministri Kurti ka folur edhe për anëtarësimin e Kosovës në Këshillin e Evropës, derisa ka potencuar se Serbia ka shkelur së paku tetë nga 11 nene të marrëveshjes së Ohrit, prandaj është vështirë të bëhet implementimi i marrëveshjes i cili nuk respektohet.
“Serbia asnjëherë nuk ka respektuar marrëveshjen. Ajo ka shkelur dhe mbishkelur çdo nen të kësaj marrëveshje së paku 8 nga 11. Është vështirë të bëhet implementimi i marrëveshjes i cili nuk respektohet. Prandaj, unë kam insistuar gjithmonë që të vendosim nënshkrimin në këtë marrëveshje, si garancë e respektimit të marrëveshjes dhe implementimit. Ky draft-statut nuk është dokument i Kosovës dhe nuk mund të nxirret nga paketa dhe në atë mënyrë të lexohet marrëveshja bazë, më pas të vendoset në qendër apo si prioritet”, ka thënë Kurti.
Ndërsa, për sulmet kibernetike që kanë ndodhur nga Rusia ndaj institucioneve të Kosovës, Kurti ka theksuar se ju qëndron prapa deklaratave të ministres së Punëve të Brendshme, Donika Gërvalla, e cila ka folur në emër të Qeverisë së Kosovës.
https://kosovapress.com/kurti-kushti-per-anetaresim-ne-kie-ishte-dhe-mbetet-absurd
