Kryeministri i Kosovës, Albin Kurti pritet të marrë pjesë sot në një konferencë nga një institut kërkimor në Londër.

Këtë e ka bërë të ditur koordinatorja e komiteteve në Lëvizjen Vetëvendosje, Dejona Mihali përmes një postimi në rrjete sociale, diksutim i cili  do të mbahet nga instituti kërkimor ODI Global.

Temë e këtij diskutimi do të jetë Shtetformimi ekonomik dhe stabiliteti global.

“Sonte në Londër. “Shtetformimi ekonomik dhe stabiliteti global”, diskutim në ODI Global në Londër. Pjesëmarrës në diskutim Kryeministri i Kosovës, Albin Kurti”, shkroi Mihali në një postim në Facebook.

Diskutimi në Londër do të jetë i hapur për pjesëmarrje fizike dhe online për publikun e interesuar, për të cilën gjë njoftoi edhe Mihali.

ODI Global është një institut kërkimor ndërkombëtar që merret me çështje të zhvillimit global, ekonomisë dhe politikave publike.

Ndërkaq ky institut po organizon një diskutim publik  që shqyrton se si veprimtaria ekonomike shtetërore po riformëson stabilitetin global në një epokë të konkurrencës gjeopolitike në rritje.

Ky aktivitet shqyrton pasojat më të gjera për sistemin ekonomik ndërkombëtar, përfshirë rreziqet e fragmentimit, të ardhmen e bashkëpunimit shumëpalësh dhe implikimet për rritjen, qëndrueshmërinë dhe zhvillimin duke përfshirë mënyrat se si vendet mund të forcojnë rezistencën e tyre ekonomike në një mjedis gjithnjë e më të pasigurt.

Duke bashkuar politikëbërës të nivelit të lartë dhe ekspertë kryesorë, diskutimi do të ofroj një platformë për analiza të orientuara drejt së ardhmes mbi mënyrën se si shtetet mund të balancojnë konkurrencën dhe bashkëpunimin në një peizazh global më të kontestuar.

Sipas njoftimit nga ODI Global diskutimi do të mbahet nga 17:00 – 18:30.

/Kosovapress/