Federata e Pingpongut e Kosovës (FPPK) është zhytur në një krizë institucionale, teksa dy tentime radhazi për mbajtjen e Kuvendit të Rregullt të Punës kanë dështuar. Kryetari aktual i federatës, Jeton Oruqi, akuzon paraardhësit të tij, Nehat Çitakun, duke e fajësuar atë për bllokadë të qëllimshme të punës së federatës.

Oruqit për KosovaPress ka thënë se dështimi i kuvendeve është pasojë e përpjekjeve të ish-kryetarit Çitaku për të mbledhur rreth vetes një grup anëtarësh të pakënaqur me reformat e ndërmarra, me synimin e vetëm për të paralizuar funksionimin e FPPK-së, derisa ky i fundit thekson se në Federatën e Pingpongut ka mostransparencë të madhe, si financiare ashtu edhe organizative.

Oruqi thotë se mbledhjet e dështuara kishin në rend dite pika jetike për pingpongun, përfshirë miratimin e buxhetit për vitin 2026, kalendarin e garave, si dhe ndryshime statutore që synojnë rritjen e llogaridhënies së zyrtarëve të federatës.

“Ajo çfarë ne synojmë të arrijmë përmes këtij kuvendi është miratimi i buxhetit për vitin 2026, miratimi i kalendarit të garave. Kemi bërë reformë strukturore në mënyrën se si do të organizohen garat, kemi reduktuar numrin e aktiviteteve që të mund të kenë më shumë kohë sportistët të punojnë në klubet e tyre dhe dhe ta ngrisin performancën e tyre, si dhe ndër të tjera kemi paraparë edhe ndryshime statutore të cilat e ngrisin nivelin e përgjegjësisë, si për kryetarin, po ashtu edhe për anëtarët e bordit dhe stafin e administratës së federatës. Me gjasë, këto hapa nuk është që po i shkojnë përshtati të gjithëve, sidomos personit në fjalë (Nehat Çitaku), të cilin edhe e përmenda, dhe është një diçka që po tentohet të bllokohet kjo punë edhe krejt këto iniciativa të cilat çojnë në reformimin e administratës së federatës edhe mënyrës se si operon pingpongu në Kosovë”, theksoi Oruqi.

Sipas Çitakut, lista e kërkesave të refuzuara është e gjatë dhe prek disa nga çështjet më të ndjeshme të menaxhimit të federatës. Grupi i pakënaqur kërkon raporte të detajuara financiare, përfshirë historikun e llogarisë bankare dhe një raport të plotë mbi shpenzimet për organizimin e ngjarjeve ndërkombëtare si ËTT Youth.

“Një prej kërkesave ka qenë që të u ipet delegatëve, siç ka qenë traditë në gjashtë vitet e fundit, historiku i llogarisë bankare. Një gjë e tillë nuk na është bërë...Mandej një raport i detajuar i të hyrave dhe të dalave dhe shpenzimeve për një projekt madhor të Federatës së Pingpongut, siç është organizimi i dy ngjarjeve botërore, WTT Youth që ishte viti i kaluar... Mandej ka qenë një kërkesë për një raport të grupit punues të formuar për të vlerësuar ligjshmërinë dhe përmbushjen e kritereve ligjore dhe si për të vlerësuar gjendjen faktike të klubeve pas shqetësimeve të ngritura për ekzistimin e klubeve fiktive”, deklaroi Çtaku.

Përballë këtij bllokimi, Çitaku zbulon se më shumë se një e treta e delegatëve kanë dorëzuar zyrtarisht një mocion mosbesimi kundër kryetarit. Sipas statutit, federata është e obliguar që brenda tri javësh të thërrasë një kuvend të jashtëzakonshëm ku do të votohet për shkarkimin ose jo të kryesisë aktuale.

“Ne e kemi dorëzuar kërkesën për mocionin për votëbesim të kryetarit, të cilin sekretari, sipas statutit duhet ta organizojë brenda tri javësh. Kështu që, me nënshkrimin e më shumë se një të tretën e delegatëve, së shpejti, domethënë brenda tri jave duhet të mbahet edhe kuvendi, jo zgjedhor, por për votëbesim, mocion për postin e kryetarit dhe strukturave të tjera udhëheqëse. Arsyeja pse e kemi bërë këtë është mostransparenca, keqmenaxhimi i federatës,

Oruqi e cilëson këtë lëvizje si “të pavend dhe të pakohë”, duke argumentuar se kërkesa nuk ka një arsyetim të qartë dhe se qëllimi i vërtetë është futja e federatës në një proces të ri zgjedhor.

“Ajo çka mund të them është që një kërkesë e tillë e cila është paraqitur lë shumë për të dëshiruar. Nuk ka asgjë të qartësuar se për çka thirret kuvendi i jashtëzakonshëm. Për çka edhe unë jam i bindur që një kohë, një kërkesë e tillë është e pavend, e pakohë. Ne i kemi caktuar datat për dy garat botërore, do të jenë në maj, me 30 maj deri me 7 qershor. Përgatitjet jemi duke i bërë, është caktuar edhe lokacioni, dhe ne duhet të shikojmë ta zhbllokojmë situatën edhe të shkojmë me organizimin e ngjarjeve prapë botërore edhe këtë vit, dhe jo të merremi me zgjedhje. Jemi lodhur prej zgjedhjeve”, ka thënë Oruqi.

Krejt këtë situatë në Federatën e Pingpongut po e vëzhgon Minsitria e Rinsië dhe Sportit e cila po kërkon që kjo situatë të zgjidhet përmes mekanizmave statutarë të federatës.

“Jemi në dijeni për situatën e krijuar në Federatën e Pingpongut, ku dy kuvendet e fundit nuk kanë arritur të përmbyllen për shkak të largimit të një pjese të delegatëve. Federatat sportive janë organizata autonome dhe funksionojnë në bazë të statuteve të tyre dhe Ligjit për Sport. Ne presim që çështja të zgjidhet përmes mekanizmave statutarë të federatës. Kemi pranuar Ftese për të hënën dhe shpresojmë që procesi të zhvillohet normalisht, në përputhje me rregullat dhe që federata të vazhdojë punën dhe funksionimin e saj të rregullt”, ka thënë Shatri.

Ndërkohë që përpjekja e tretë për mbajtjen e kuvendit është caktuar për të hënën, e ardhmja e pingpongut kosovar mbetet peng i përplasjeve për pushtet, duke vënë në rrezik zhvillimin e sportit dhe organizimin e garave. A. Bytyqi.