Kombëtarja e Kosovës në futsall ka vazhduar me paraqitje mbresëlënëse në parakualifikimet për Botërorin 2028, duke regjistruar fitoren e dytë radhazi në miniturneun e Grupit D që po zhvillohet në Igalo.

Dardanët triumfuan në një ndeshje spektakolare ndaj Austrisë me rezultat 6:3, duke dëshmuar formë të lartë dhe efikasitet në momentet kyçe të takimit.

Ndeshja nisi me ritëm të lartë nga të dyja skuadrat, por Kosova ishte më konkrete para portës. Rezultatin e zhbllokoi Shefki Kameri në minutën e 11-të, ndërsa më pas shkëlqeu Ramadan Alaj, i cili realizoi katër gola, duke qenë pa dyshim lojtari i ndeshjes. Në listën e golashënuesve u regjistruar edhe Shqiprim Imeri, që shënoi në minutën e 28-të.

Nga ana tjetër, për Austrinë realizuan Gustavo dhe Alex Flogel, por përpjekjet e tyre nuk mjaftuan për të ndalur ritmin ofensiv të Kosovës. Me këtë fitore, Kosova ka siguruar tashmë kualifikimin në fazën kryesore të eliminatoreve, pasi dy vendet e para nga grupi avancojnë tutje.

Ndeshja e fundit dhe vendimtare për vendin e parë në grup do të zhvillohet ndaj Malit të Zi, të dielën nga ora 19:30, ku Dardanët synojnë ta mbyllin këtë fazë me maksimumin e pikëve.

KosovaPress