Kosova po cilësohet si vendi i 16-të më i lumtur në tërë botën, nga raporti vjetor që mat lumturinë globale, duke e bërë atë vendin e parë në rajon që e gëzon këtë pozitë. Kjo shënon një ngritje në listë, pasi në vitin 2025 ajo u rendit në vendin e 29-të.

Shtetet fqinje prapë mbetën prapa. Shqipëria  renditet në vendin e 86-të, Maqedonia e Veriut e 82-ta, Mali i Zi në vendin e 60-të dhe Serbia në vendin e 30-të.

Për të nëntin vit radhazi, vendin e parë e zë Finlanda, ndërsa vendet nordike të tjera (Islandë, Danimarkë, Suedi, Norvegji) janë gjithashtu në top 10, transmeton KosovaPress.

Raporti i zhvilluar nga Qendra për Studime të Mirëqenies në Universitetin e Oksfordit sugjeron se përdorimi i tepërt i rrjeteve sociale, veçanërisht në disa vende, jep një pjesë të rëndësishme të shpjegimit. Sigurisht, kjo nuk do të thotë që përdorimi i rrjeteve sociale shpjegon rënien e lumturisë në këto rajone, pasi që rol luajnë edhe faktorë të tjerë.

Studimi ka përdorur tregues të tillë si faktorët ekonomikë, mbështetja sociale, jetëgjatësia e shëndetshme, liria për të bërë zgjedhje jetësore, bujaria dhe perceptimet e korrupsionit.

Përdorimi i tepërt i rrjeteve sociale po shkakton rënie të ndjeshme të mirëqenies tek të rinjtë, veçanërisht tek vajzat adoleshente në vendet anglishtfolëse dhe Evropën Perëndimore, sipas Raportit Botëror të Lumturisë 2026.

Shtetet anglishtfolëse nuk janë në top 10 këtë vit: SHBA 23, Kanada 25, Britania 29. Raporti vjen ndërsa shumë vende po shqyrtojnë kufizime për përdorimin e rrjeteve sociale nga të miturit.

/Kosovapress/