Konjufca takoi senatorët amerikanë: Nuk mund të formohet mekanizëm që cenon sovranitetin
Lexohet për: 2 min.
1 vit më parë
Linku u kopjua
Kryetari i Kuvendit, Glauk Konjufca, ka deklaruar se nuk mund të formohet asociacion, apo ndonjë mekanizëm tjetër, që cenon sovranitetin dhe integritetin e Republikës së Kosovës. Këtë qëndrim ai e ka ndarë edhe me senatorët amerikanë, Chris Murphy dhe Gary Peters, të cilët po qëndrojnë në Kosovë.
Në takimin e zhvilluar në Kuvendin e Kosovës, Konjufca ka theksuar se mbështetja e Shteteve të Bashkuara është qenësore për proceset nëpër të cilat po kalon Kosova.
“Ai theksoi se mbështetja e SHBA-së është qenësore për proceset e rëndësishme nëpër të cilat po kalon Republika e Kosovës. Gjithashtu përsëriti qëndrimin e shtetit të Kosovës, mbështetur edhe në garancinë e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, integritetin territorial dhe rendin kushtetutës të Republikës së Kosovës”, është bërë e ditur në komunikatën e Kuvendit.
Sipas kësaj komunikate, Konjufca dhe senatorët amerikanë kanë konstatuar se marrëdhënia mes Kosovës dhe SHBA-ve është speciale dhe se ata kanë shprehur përkushtimin për fuqizimin e mëtejmë të bashkëpunimit dhe avancimin e marrëdhënieve.
Senatorët amerikanë janë pritur në takim edhe nga presidentja Vjosa Osmani, si dhe kryeministri Albin Kurti.
Aty kanë theksuar mbështetjen e Shteteve të Bashkuara, si dhe kanë kërkuar që Serbia të ndalojë së penguari Kosovën në rrugën e saj drejt anëtarësimit në organizata ndërkombëtare.
