Konfiskohen 91 kilogram marihuanë në Podujevë, arrestohet një person
Lexohet për: 3 min.
2 vite më parë
Linku u kopjua
Policia e Kosovës ka konfiskuar 91 kilogram substancë narkotike të llojit marihuanë në fshatin Konushevc të Podujevës. Përmes një aksioni që kanë ndërmarrë dje, zyrtarët policorë kanë arrestuar një person dhe tre të tjerë kanë shpallur në kërkim.
Në një konferencë për medie të enjten, drejtori i anti-drogës në Polici, Reshat Murseli, tha se droga ka ardhur nga Shqipëria dhe destinacion ka pasur fillimisht vendet fqinje dhe më pastaj shtetet evropiane.
Në këtë operacion, Murseli tha se është lënduar një zyrtar policor, derisa edhe janë shkrepur armët zyrtare.
“Të dyshuarit që nga afërsia u dyshuan që kishin edhe armë dhe ishin të njohur edhe nga e kaluara e tyre kriminale, nuk kanë përfillur urdhrat policore për ndalje, por kanë rritur intensitetin e lëvizjes me veturë duke kanosur zyrtarët policorë, duke goditur me veturë dhe shkaktuar lëndime të lehta një hetuese dhe dëme materiale veturës së Policisë. Ky moment i kanosjes së drejtpërdrejt të jetës ka bërë që hetuesit të përdorin armë zyrtare me dy shkrepje pa shkaktuar pasoja në njerëz, por vetëm disa dëme materiale. Vetura e dyshuar me targa gjermane është ndaluar rreth dy deri treqind metra larg nga vendi i ngjarjes. I dyshuari braktisë veturën dhe arrin të arratiset në këmbë në drejtim të panjohur... Në kontroll të menjëhershme të veturës dhe kontroll të saj, Policia ka gjetur dhe konfiskuar 34 paketime të ekspozuara para jush me substancë narkotike në peshë 91 kilogram”, tha ai.
Drejtori i anti-drogës tha se pas kontrollimit në shtëpitë e të dyshuarve është arrestuar një person.
“Janë kontrolluar shtëpitë e të dyshuarve dhe objektet përcjellëse, një shtëpi në fshatin Konushevc komuna e Podujevës dhe është arrestuar një i dyshuar F.M., i moshës 55 vjeç. Kjo shtëpi dyshohet se është përdorur depo për narkotikët. Po ashtu është kontrolluar shtëpia e të dyshuarit të dytë, M.Q. në fshatin Brodosane, komuna e Dragashit, por nuk është gjetur asgjë e dyshuar. Si rrjedhojë e këtij operacioni policor një i dyshuar është arrestuar dhe në konsultim me prokurorin i është caktuar masa e paraburgimit 48 orë. Polica e Kosovës është në kërkim edhe të së paku tre të dyshuarve të tjerë, tashmë të njohur për ne, që dyshohet se kanë qenë pjesë e këtij grupi kriminal”, theksoi Murseli.
Në bazë të hetimeve preliminare, Murseli tha se droga ka origjinën nga Shqipëria dhe ka kaluar përmes Prizrenit në drejtim të Podujevës.
“Hetimet e zhvilluara deri tani flasin se droga ka një orgjinë nga Shqipëria dhe ka kaluar përmes Prizrenit në drejtim të Podujevës me një destinacion në vendet fqinje dhe përmes tyre vendet e BE-së”, shtoi ai.
Murseli tha se të dyshuarit janë vëzhguar për disa muaj nga Policia dhe përveç drogës kanë konfiskuar disa vetura dhe 650 euro.
