Një hulumtim i CBS News ka zbuluar një skemë të rrezikshme në industrinë e transportit rrugor në SHBA, në të cilën përfshihet edhe Serbia.

Bëhet fjalë për kompani transporti që ndryshojnë emra dhe identitete për të shmangur historikun e shkeljeve dhe kontrolleve të sigurisë, të ashtuquajturat “transportuesit kameleon”.

Sipas raportimit, këto rrjete shpesh operojnë me struktura të lidhura me kompani të huaja dhe amerikane, duke krijuar kompani të reja transporti brenda një kohe shumë të shkurtër. Ato regjistrohen zyrtarisht, por më pas, pas akumulimit të shkeljeve të shumta të sigurisë, mbyllen ose “zhduken” dhe rihapen me emra të rinj, duke shmangur kështu historikun negativ.

Një nga rrjetet më të përmendura në hetim është Super Ego Holding, me bazë në Serbi dhe SHBA, e cila është aktualisht nën hetim federal dhe pjesë e një padie kolektive nga qindra shoferë. Sipas autoriteteve dhe ish-punonjësve, kjo kompani përbën një nga rastet më të njohura të kësaj skeme në rrugët amerikane. Kamionët e markës Super Ego nisën transportin e mallrave në SHBA para shtatë vitesh. Kompania u themelua nga sipërmarrësi serb Aleksandar Mimiq dhe është zgjeruar në një rrjet të madh të lidhur me më shumë se dy duzina transportues në SHBA, me qendra në Elmhurst, Illinois dhe Jacksonville, Florida, si dhe me klientë të mëdhenj si Amazon, Walmart, Costco dhe Shërbimi Postar i SHBA-së.

Eksperti i sigurisë në transport, Rob Carpenter, shpjegon se këto kompani funksionojnë duke krijuar dhe mbyllur vazhdimisht biznese të reja për të shmangur historikun e shkeljeve, duke filluar nga e para çdo herë dhe duke hyrë sërish në treg pa reputacion negativ. Sipas tij, kjo i bën ato të duken “të pastra” në sistem, edhe pse në realitet kanë një histori të rëndë shkeljesh.

Hetimi tregon gjithashtu se disa prej këtyre kompanive operojnë me mijëra shkelje sigurie, aksidente dhe probleme teknike, ndërsa mbikëqyrja federale është e kufizuar, me vetëm disa qindra inspektorë për qindra mijëra kompani transporti në SHBA.

Rrjeti Super Ego akuzohet nga shoferët për kushte të rënda pune dhe shfrytëzim financiar. Shoferi Daniel Sanchez, i cili iu bashkua kompanisë në vitin 2025, thotë se premtimet për të ardhura të larta nuk u realizuan dhe se shpesh ka përfunduar pa pagesë ose edhe me borxh.

“Për mua personalisht është shkatërruese, sepse kjo ishte ëndrra ime – të kisha kamionin tim. Mendova se kjo kompani do të më ndihmonte të arrija aty ku doja. Por atyre nuk u intereson. Nuk je njeri për ta, je vetëm një numër”, tha Sanchez.

Ai dhe shoferë të tjerë pretendojnë se janë detyruar të punojnë orë të gjata, shpesh duke u shkelur kufizimet ligjore të drejtimit, ndërsa në disa raste sistemet e regjistrimit të orëve janë “rivendosur” për t’i lejuar të vazhdojnë punën pa pushim.

Një ish-punonjës i rrjetit në Evropë ka konfirmuar për CBS se brenda kompanisë ekzistonte presion i vazhdueshëm për të maksimizuar fitimet nga shoferët dhe se kjo praktikë trajtohej si diçka normale në sistemin e punës.

Sipas tij, në disa periudha, fitimet e rrjetit mund të arrinin deri në miliona dollarë në javë, ndërsa një pjesë e konsiderueshme e parave merrej nga tarifat dhe zbritjet ndaj shoferëve.

Super Ego Holding i ka mohuar të gjitha akuzat, duke deklaruar se është vetëm kompani leasing dhe jo përgjegjëse për veprimet e transportuesve të lidhur me të. Megjithatë, sipas hetimit dhe dokumenteve gjyqësore, struktura e saj përfshin një rrjet të gjerë kompanish të koordinuara.

Aktualisht, më shumë se 800 shoferë kanë ngritur padi kundër kompanisë dhe rrjeteve të lidhura me të, duke e akuzuar për mashtrim dhe shkelje të kontratave.

/Kosovapress/