San Antonio Spurs ka shënuar fitore “jetike” ndaj New York Knicks me rezultat 115:111 në ndeshjen e tretë të finales së NBA-së, që u zhvillua në orët e para të së martës, sipas kohës lokale në Kosovë.

Me këtë triumf, ekipi nga shteti amerikan i Teksasit ngushtoi serinë në 2-1.

Knicks kishin fituar dy ndeshjet e para, që Spurs i luajtën si vendas.

Ylli i San Antonios, francezi Victor Wembanyama, ishte vendimtar në fitore, me 32 pikë, tetë kërcime dhe gjashtë asistime, ndërsa Stephon Castle shtoi 23 pikë.

Në anën tjetër, Jalen Brunson realizoi 32 pikë për Knicks, kurse OG Anunoby kontribuoi me 28.

Me humbjen nga Spurs, njujorkezët i dhanë fund serisë së tyre prej 13 fitoresh radhazi në play-off, ndërsa regjistruan edhe disfatën e parë pas 46 ditësh.

Mysafirët teksanë e nisën ndeshjen mirë dhe krijuan epërsi të dyfishtë që në çerekun e parë, por Knicks reaguan dhe përmbysën rezultatin për të shkuar në pushim me avantazh 64:57.

Megjithatë, Spurs u rikthyen në pjesën e dytë dhe me një paraqitje të fortë në momentet vendimtare siguruan fitoren.

Ndeshja u zhvillua në Madison Square Garden, ku finalet e NBA-së u kthyen për herë të parë pas 27 vjetësh.

I pranishëm në këtë ndeshje ishte edhe presidenti amerikan Donald Trump, i cili qysh moti ka bërë me dije se është tifoz i ekipit që luan në Madison Square Garden.

Ndeshja e katërt do të zhvillohet të enjten, ku Spurs do të synojnë barazimin e serisë në 2-2 ndërsa Knicks avantazhin në 3 me 1.

/Kosovapress/