Pas vdekjes së nënës së Kris Jenner, Mary Jo “MJ” Shannon, Khloe Kardashian zbuloi premtimin që gjyshja e saj kishte bërë në lidhje me të ndjerin Robert Kardashian.

MJ kishte një mesazh për të përcjellë.

Pasi nëna e Kris Jenner, njëkohësisht gjyshja e Kourtney, Kim, Khloe, dhe Rob Kardashian, Kendall dhe Kylie Jenner ndërroi jetë më 16 korrik, në moshën 91-vjeçare, Khloe ndau premtimin që matriarkja e familjes u kishte bërë nipërve dhe mbesave të saj në lidhje me babanë e tyre, të ndjerin Robert Kardashian.

“E di që parajsa të priti me krahë hapur, e rrethuar nga të gjithë ata që mezi prisnin të të shihnin sërish,” shkroi Khloe në një postim në Instagram më 19 korrik. “Dhe e di që e mbajte premtimin tënd, duke i treguar babait tim sa shumë e duam dhe sa shumë na mungon.” raporton E News, përcjell KosovaPress

Robert Kardashian ndërroi jetë në vitin 2003, kur Khloe, fëmija i dytë më i vogël nga katër fëmijët që ai kishte me Kris Jenner, ishte vetëm 19 vjeçe.

Përveçse foli për premtimin e MJ-së për t’i përcjellë një mesazh babait të saj, Khloe reflektoi edhe mbi trashëgiminë që gjyshja e saj lë pas.

“Faleminderit që na mësove se jeta është bërë për t’u festuar, se e qeshura shëron dhe se dashuria është trashëgimia më e madhe që mund të lëmë pas,” shkroi bashkëthemeluesja e ‘Good American’ për MJ, e cila pati shpesh paraqitje në serialin e familjes.

Ajo shtoi se një nga “bekimet më të mëdha” të jetës së saj është fakti që fëmijët e saj me Tristan Thompson, vajza 8-vjeçare True dhe djali 3-vjeçar Tatum, patën mundësinë ta njihnin stërgjyshen e tyre dhe të përjetonin përqafimet, gëzimin, historitë dhe “dritën e jashtëzakonshme” që ajo rrezatonte.

Ishte Kris Jenner ajo që e bëri publike e para lajmin për ndarjen nga jeta të nënës së saj, duke përshkruar lidhjen e thellë që kishin mes tyre.

“Mami, faleminderit për çdo sakrificë që bëre, për çdo copëz urtësie që ndave me ne dhe për çdo çast në të cilin na deshe pa kushte,” shkroi Kris në Instagram në atë kohë. “Do të më mungojnë bisedat tona të përditshme, buzëqeshja jote, e qeshura jote… Zemrat tona janë të thyera, por gjejmë ngushëllim duke ditur se një dashuri si e jotja nuk largohet kurrë vërtet. Dashuria jote do të jetojë përgjithmonë në familjen tonë, në traditat tona, në çdo moment që kalojmë së bashku dhe në jetën e çdo personi që preke.”