Misioni i NATO-s në Kosovë, KFOR, konfirmoi se e ka autorizuar Forcën e Sigurisë së Kosovës të dislokojë ekipe të kërkim-shpëtimit në Liqenin e Ujmanit. Autorizimin, siç thuhet në njoftim, e ka dhënë komandanti Enrico Barduani.

KFOR-i tha se autorizimi është dhënë për arsye humanitare dhe se operacioni zhvillohet nën kushte specifike të vendosura nga ky mision - i cili gjithashtu do të ofrojë siguri gjatë gjithë operacionit.

“Angazhimi i FSK-së në këtë rast është në përputhje me mandatin e saj fillestar, i cili përfshin ndihmë për komunitetet lokale në raste fatkeqësive natyrore dhe operacione të kërkim-shpëtimit”, tha KFOR-i.

Njësitë e specializuara për kërkim-shpëtim të Forcës së Sigurisë së Kosovës po zhvillojnë operacion për gjetjen e një personi që dyshohet të jetë mbytur të dielën, më 27 korrik, në Liqenin e Ujmanit. Bëhet fjalë për një 33 vjeçar që u raportua se kërceu nga ura.

Kërkimi deri më tash është zhvilluar vetëm nga Policia e Kosovës dhe Shoqata e Kosovës për Kërkim dhe Shpëtim. FSK-ja iu bashkua ekipeve në ditën e tretë të kërkimeve. Kjo u bë vetëm pas një bashkërendimi me misionin e NATO-s në Kosovë, KFOR.

Dislokimi i trupave të FSK-së në veriun e banuar me shumicë serbe mund të bëhet vetëm me pëlqim paraprak të KFOR-it, në bazë të një zotimi që është bërë në vitin 2013 nga Qeveria e Kosovës dhe NATO.

Ujmani ndodhet në Zubin Potok – një prej katër komunave veriore të Kosovës, të banuara me shumicë serbe.

Ministri në detyrë i Mbrojtjes, Ejup Maqedonci tha se më herët të martën se pjesëtarët e FSK-së janë angazhuar në mbështetje të autoriteteve civile në këtë rast.

“Forca e Sigurisë së Kosovës në kuadër të detyrave të saj thelbësore ka edhe mbështetjen e autoriteteve civile. Në këtë aspekt në bashkëpunim me Agjencinë e Menaxhimit të Emergjencave, Policinë e Kosovës dhe bashkërendim me KFOR, ekipet e specializuara të FSK kanë filluar operacionin e kërkimit në liqenin e Ujmanit me synimin që sa më shpejtë të nxirret trupi i mërgimtarit dhe ti lehtësohet dhimbja familjes’, shkroi Maqedonci në Facebook.

Forca e Sigurisë së Kosovës është duke e zhvilluar transformimin në ushtri, proces ky që pritet të përfundojë deri në vitin 2028.

https://kosovapress.com/rama-tregon-rastet-kur-fsk-ja-operoi-ne-veri-eshte-obligim-ligjor-e-human

/Kosovapress/