Dogana e Kosovës ka zbuluar 11 fishekë për armë gjatë kontrollit të një udhëtari në Aeroportin Ndërkombëtar të Prishtinës.

Sipas Doganës së Kosovës, rasti është evidentuar gjatë kontrolleve rutinë të udhëtarëve në fluturimin Hamburg – Prishtinë. Udhëtari ishte përzgjedhur për kontroll pasi kishte kaluar nëpër kanalin e gjelbër.

Gjatë skanimit të bagazhit, zyrtarët doganorë kanë identifikuar elemente të dyshimta që mund të përbënin mall të ndaluar. Më pas është kryer kontroll fizik i valixhes, ku janë gjetur 11 copë fishekë për armë.

Pas zbulimit të municionit, është njoftuar Policia e Kosovës në Aeroportin e Prishtinës, e cila ka ndërmarrë veprimet e mëtejshme ligjore dhe ka konfiskuar fishekët e gjetur.

Dogana e Kosovës ka theksuar se mbetet e përkushtuar në zbatimin e ligjit dhe në parandalimin e hyrjes së paligjshme të mallrave të ndaluara në territorin e Republikës së Kosovës.

Alarm në Aeroportin e Prishtinës, Dogana zbulon fishekë në bagazhin e një udhëtari nga Hamburgu.

/Kosovapress/