Presidenti i Federatës së Futbollit Iranian, Mehdi Taj, ka konfirmuar se kombëtarja e tyre do të marrë pjesë në Botërorin 2026, por ka refuzuar që ndeshjet të luhen në territorin e Shteteve të Bashkuara.

Për shkak të konfliktit të hapur që nisi në shkurt, Federata Iraniane po negocion me FIFA-n që tri ndeshjet e grupit kundër Zelandës së Re, Belgjikës dhe Egjiptit të zhvendosen në Meksikë. Ndërkohë që Presidentja meksikane, Claudia Sheinbaum, u shpreh e hapur për këtë ndryshim, FIFA deri më tani ka insistuar në respektimin e kalendarit zyrtar të shpallur në dhjetor 2025.

Situata mbetet e tensionuar edhe në aspektin e sigurisë dhe të drejtave të njeriut, veçanërisht pas kthimit të ekipit të femrave nga Australia, ku disa anëtare kërkuan azil. Përfaqësuesit e sindikatës së lojtarëve, FIFPRO, kanë deklaruar se FIFA ka përgjegjësi institucionale për të garantuar sigurinë e çdo pjesëmarrësi.

Megjithatë, Taj ka qenë i prerë në qëndrimin e tij politik duke u shprehur: "Ne do të bëjmë bojkot Amerikës, por nuk do të bëjmë bojkot Kupës së Botës," duke e lënë fatin e ndeshjeve në dorë të bisedimeve diplomatike me qeverinë botërore të futbollit.

KosovaPress