Kur kanë mbetur edhe saktësisht 30 ditë nga fillimi i Kampionatit Botëror të Futbollit 2026, një hije e rëndë shqetësimi ka rënë mbi organizimin në Shtetet e Bashkuara të Amerikës.

Prania e konfirmuar e agjentëve të Shërbimit të Emigrimit dhe Doganave (ICE) nëpër stadiume dhe qytete nikoqire ka ngritur alarme të mëdha se tifozët udhëtues dhe punëtorët emigrantë mund të përballen me ndalime apo ngacmime, raporton revista e njohur The New Republic.

Ndonëse në fillim të vitit kreu i ICE-it, Todd Lyons, deklaroi se agjentët do të jenë të pranishëm vetëm për çështje të sigurisë dhe jo për zbatim të ligjeve të emigrimit, situata në terren duket krejt ndryshe.

Komiteti Organizativ i Los Angeles-it ka pranuar se nuk ka marrë asnjë garanci zyrtare se agjentët nuk do të ndërmarrin aksione apo bastisje, pavarësisht kërkesave direkte nga presidenti i FIFA-s, Gianni Infantino, dhe kërcënimeve për grevë nga punëtorët e industrisë së ushqimit.

Udhëheqësja e komitetit pritës në Los Angeles, Kathryn Schloessman, u shpreh e pafuqishme përballë këtij vendimi:

"Ne po punojmë shumë ngushtë me ta për t'u siguruar që ata të jenë të fokusuar vetëm tek ne, duke na ofruar një ngjarje të sigurt dhe asgjë tjetër. Por, duke thënë këtë, unë nuk jam vendimmarrësja përfundimtare për këtë çështje", u shpreh Schloessman.

Sipas The New Republic, prania operative e ICE-it dhe potenciali për bastisje masive mund të kthehet në një makth të vërtetë logjistik dhe diplomatik për SHBA-në, qytetet mikpritëse, tifozët ndërkombëtarë dhe mijëra punëtorë emigrantë që qëndrojnë prapa skenave të këtij Botërori.

---

KosovaPress