Tre persona kanë mbetur të lënduar nga një incident i armatosur që ndodhi mbrëmë në lagjen Mati të Prishtinës.

Dy nga ta, njëri si doras i dyshuar, po trajtohen në QKUK nën mbikëqyrje të policisë. Dorasi u kap pas një kohe arratie, me plagë në këmbë. Ndërsa njëri nga dy viktimat që është në spital, sipas mjekëve, është në gjendje të rëndë shëndetësore.

Njësitë relevante të policisë kanë dalë në vendin e ngjarjes, ku është konfiskuar vetura në të cilën kishte ndodhur rasti, por nuk raportohet të jetë gjetur arma. Me vendim të prokurorit të dyshuarit i është caktuar masa e ndalimit policor, transmeton KosovaPress. 

Në raportin 24 orësh të policisë për kryeqytetin, raportohet edhe një arrestim të një personi që i shkaktoi lëndime një tjetrit, për shkak të të cilave këtij të fundit iu desh trajtim mjekësor. Incidenti ka ndodhur në rrugën “Besëlidhja”, derisa në rrugën “Ahmet Krasniqi”, dje herët më mëngjes thuhet se në një pikë kontrolli, policia gjeti tek i dyshuari mashkull kosovar një karikator me 14 fishekë, të cilin e sekuestroi. I dyshuari është sjellë në stacion policor për intervistim dhe pas inicimit të rastit, me urdhër të prokurorit, është liruar në procedurë të rregullt.

Një këllëf i armës, një thikë ushtarake dhe një telefon, u sekuestruan edhe gjatë bastisjes në një shtëpi në Hajvali. Aty policia kërkoi njërin nga dy të arratisurit pas të shtënave me armë që u dëgjuan në natën mes të hënës dhe të martës. 

/Kosovapress/