Kapiteni i Brentfordit, Jordan Henderson, ka pësuar një dëmtim serioz në dorë pas fitores dramatike 3-2 të Anglisë ndaj Meksikës në 1/8 e finales së Kupës së Botës 2026.

Mesfushori u rrëzua mbi një tabelë reklamuese pas përfundimit të ndeshjes në stadiumin "Azteca", duke u dërguar me barelë në spital, ndërsa pjesa tjetër e ekipit u kthye në bazën e saj në Kansas City.

Trajneri Thomas Tuchel konfirmoi se gjendja e Henderson nuk duket e mirë.

"Nuk është mirë. Jordan u rrëzua dhe lëndoi kyçin e dorës. Duket një dëmtim shumë i rëndë," deklaroi ai.

Edhe kapiteni Harry Kane foli për incidentin:

"Jordan u rrëzua aty. Mendoj se është mirë, por ka diçka me krahun e tij."

Ndërsa Jude Bellingham shtoi:

"Është në një situatë të vështirë, por ekipi ynë mjekësor ka gjithçka nën kontroll. Të gjithë ishim pranë tij për ta mbështetur."

Pavarësisht se ka luajtur vetëm pak minuta në këtë Botëror, Henderson konsiderohet një figurë e rëndësishme në dhomat e zhveshjes së Anglisë.

Bellingham e vlerësoi lart ndikimin e tij, duke thënë:

"Është njeriu më qesharak në ekip dhe ai që i mban të gjithë të bashkuar."

Ndërkohë, ish-kapiteni i Anglisë, John Terry, kritikoi mënyrën si u promovua roli i Henderson, duke e quajtur atë "pak të çuditshme" dhe duke sugjeruar se ishte një "PR job" nga Federata Angleze.

Anglia siguroi kualifikimin në çerekfinale dhe tani do të përballet me Norvegjinë, ndërsa mbetet për t'u parë nëse Henderson do të jetë në gjendje t'i bashkohet skuadrës në vazhdim të turneut.

KosovaPress