Tre persona janë helmuar nga uji i konsumuar në një lokal në Shkodër. Policia sqaron se 41-vjeçarja A.Z., djali i saj 14-vjeçari A.Z., dhe 30-vjeçari M.M., , janë paraqitur në spital për të marrë ndihmë mjekësore. 41-vjeçarja dhe djali i saj janë dërguar për mjekim më të specializuar në Tiranë.

“Më datë 28.12.2022, rreth orës 23:30, në Spitalin Rajonal Shkodër, janë paraqitur për të marrë ndihmë mjekësore, shtetasja A. Z., 41 vjeçe dhe djali i saj, shtetasi A. Z., 14 vjeç, banues në Malësi të Madhe, si dhe shtetasi M. M., 30 vjeç (kamarier i lokalit), banues në Shkodër, të cilët dyshohet se janë helmuar nga uji i konsumuar në një lokal, në Shkodër.

Shtetasja A. Z., së bashku me djalin e saj, janë dërguar për mjekim më të specializuar, në Tiranë. Grupi hetimor, në bashkëpunim me Drejtorinë Rajonale të AKU-së, Shkodër, nën drejtimin e Prokurorisë pranë Gjykatës së Rrethit Gjyqësor Shkodër, vijon intensivisht punën për sqarimin e plotë të rrethanave të kësaj ngjarjeje”, njofton Policia.

Për ngjarjen ka reaguar menjëherë institucioni i Ujësjellës Kanalizimeve Shkodër, ku kanë siguruar qytetarët se uji është cilësor. UKSH bën me dije se 41-vjeçarja, djali i saj dhe kamarieri i lokalit, janë intoksikuar pasi kanë konsumuar ujë të ambalazhuar.

“Ujësjellës Kanalizime Shkodër, në kuadër të transparencës dhe komunikimit me klientët e vet, sqaron opinionin publik lidhur me një lajm që është shpërndarë minutat e fundit: Personat nënë e bir dhe një kamarier, janë intoksikuar pasi kanë konsumuar ujë të ambalazhuar nga një kompani. Kjo konfirmohet edhe nga Prokuroria dhe AKU që bashkarisht po punojnë për zbardhjen e plotë të rrethanave të ngjarjes. UK Shkodër siguron klientët për cilësinë e ujit, monitoruar periodikisht nga specialistë të Drejtorisë së Shendetit Publik Shkodër", thuhet në njoftim.

/rtsh.al/