Nënkryetari i LDK, Lutfi Haziri, tha pasdite se ish-presidentja Vjosa Osmani mbetet i vetmi propozim i LDK-së për presidente, ndryshe nga një qëndrim i mëparshëm.

Më herët gjatë ditës, Radio Evropa e lirë , duke iu referuar deklaratës së Hazirit, raportoi se Lidhja Demokratike e Kosovës (LDK) mund të unifikohet dhe t’i ofrojë votat e 18 deputetëve të saj të zgjedhur në Kuvendin e Kosovës, në rast se Lëvizjen Vetëvendosje, si partia fituese e zgjedhjeve të parakohshme parlamentare të 7 qershorit, i ofron postin e presidentit të vendit në një marrëveshje eventuale.

“Në rast se ky emër është Lumiri [Abdixhiku, kryetar i partisë] ose emri im, atëherë mund të unifikohemi. Lumirit i bie të jetë i pari, sipas detyrës zyrtare, sepse është kryetar. Pas Lumirit, konsensus më të madh [brenda LDK-së] kam unë”, theksoi Haziri, transmetoi Radio “Evropa e Lirë”.

Por, pasdite  Haziri në një “sqarim për interesimin e publikut”, të postuar në rrjetin social Facebook, tha se ish-presidentja Vjosa Osmani, mbetet i vetmi propozim i LDK-së për presidente.

“Asgjë s’ka ndryshuar. Nominimi për presidente i Vjosa Osmanit mbetet i vetmi emër nga radhët e LDK-së. Në kuadër të debatit paszgjedhor, në emër të LDK-së kam paraqitur parimet gjithëpërfshirëse dhe modalitetet për bashkëpunim të mundshëm, për krijimin e stabilitetit politik dhe institucional”, shkroi Haziri.

Ai tha se Abdixhiku mbetet adresa e vetme për zhvillimin e proceseve politike në të ardhmen e afërt.

“Kërkesat politike, ndërkaq, çfarëdo natyre qofshin, do të trajtohen brenda strukturave legale të LDK-së. Demokracia është barazvlefshme me lirinë dhe pavarësinë e Republikës. Kauza ‘një parti, një shtet’ është kauzë e humbur. Askush mbi Republikën!”, shkroi Haziri.

/Kosovapress/